من المعتقدات الخاطئه إن التطور اللغوي عند الطفل بيبدأ فى تانى سنه، لما الطفل يقدر ينطق كلمه كامله واضحه وصريحه، لكن الحقيقة إن التطور اللغوي يبدأ منذ الولادة ويبلغ ذروته عند سنه ونص.

عشان كده فى أول سنة من عمر الطفل لازم نركز على تعريفه بالأشياء المحيطة به عن طريق الإستماع

مثال: لو عايزين نعلم الطفل كلمة "تفاحه"
- هنقعد قدام الطفل ونتأكد إن تركيزه معانا🧐
- هنمسك التفاحه ونقول دى "تفاحه .. تفاحه" وهنكرر الكلمه كذا مره
- لقيتى الطفل شدها منك وحاول يلعب بيها مفيش مشكله سيبيه يستكشفها بحرية ولما يسيبها ارجعى تانى كررى "تفاحه🤗"
- أهم نقطه إنك لما تحاولى تعلمى طفلك حاجه جديده لازم تبقى حاجه واحده بس (تفاحه بس) مش (تفاحه وموزه وبرتقاله) عشان تركيزه يبقى كله فى الحاجه دى
- أقصى عدد يمكن إدخاله للطفل فى اليوم هو ثلاث أشياء مع مراعاة الفصل بينهم، يعنى الصبح هنتعلم تفاحه بعد الظهر هنتعلم موزه بعد المغرب هنتعلم برتقاله وهكذا ...
- حاولى بقدر الإمكان تبدأى بإدخال الكلمات اللى بتبدأ بأصوات يصدرها الطفل زى (م, ب, ت, د)

**استغلى وقت الإستحمام أو تغيير الحفاض فى تعريف الطفل على أجزاء جسمه
الطفل بيخزن حصيلته اللغوية عن طريق الإستماع المباشر للأشخاص اللى حواليه وبيعتمد على الحصيلة دى بعد كده فى تعلم قواعد اللغة

فى الفتره دى لازم نكلم الطفل باستمرار بلغة واضحة وسليمة لأن فى السنوات الأولى من عمر الطفل اكتساب اللغة بيكون تلقائي دون أدنى وعى منه هو بس بيردد اللى بيسمعه