ليه الطفل - نورمال ( طبيعي) أو عنده مشاكل لغوية بسيطة - اللي أشتغل نمائي ( تنمية مهارات) بيكون أسرع و أفضل في الأكاديمي من الطفل اللي بدأ أكاديمي ع طول ؟؟؟!!!

1/ الطفل تم تدريبه على الإدراك البصري بكل أنواعه فبتالي مش هيقلب الحروف المتشابهة ولا هيحصل تداخل ما بينهم لأنه متدرب علي أصعب من كدا.
2/ الطفل تم تدريبه على مهارات لغوية ( يعني عرف يميز مفرد و الجمع و التأنيث و التذكير و فهم الأسئلة و الإجابة عليها.....) فبتالي لما بندخل في القواعد الطفل بيكون فاهم المطلوب منه يكتب فقط عكس الطفل اللي بيبدأ أكاديمي فجأة بيكون أول مرة يسمع حاجة زي كدا.
3/ الطفل تم تدريبه على مهارات الإنتباه بكل أنواعه ف لما بنشتغل ماث/حساب و الاستخراج من القطعة و الإملاء الموضوع بيكون أسهل كتير لأنه تم تدريبه على أفكار أصعب فبيكون دايماً متقدم و ثقته بنفسه أعلي ✅
4/تم تدريبه على الذاكرة بكل أنواعها فبتالي قدراته علي الاحتفاظ بالمعلومات و استرجاعها بتكون أفضل و دا بيظهر أكتر ف حفظ القرآن .
5/ الطفل تم تدريبه ع البراجماتيك( فهم ما وراء الكلام) و مهارات التفكير و حل المشكلات فبتالي بيكون أسرع و اذكي في حل المشكلات من الطفل العادي - لأنه بيكون مر بمشكلات و صعوبات كتير.
6/ بتقوي عضلات اليد الدقيقة و تنمي التارز البصري الحركي علشان لما نيجي نكتب خطه يكون حلو و مضبوط و يكتب ع السطر و يراعي المسافة.....
7/ الطفل تم تدريبه على مهارات الإنتباه و الإدراك السمعي فبتالي مش هيقابل مشاكل في الحروف اللي أصواتها متشابهة ( ت-ك-س-ث) لأنه متدرب علي أصعب من كدا بكتيرررر.

*** تنمية مهارات مش حاجة سهلة أو بسيطة زي ما ناس كتير مفكرة في أطفال ما شاء الله عليهم لو جابت طفل ضعف سنهم يسبقوا 🥰

بس هنسأل سؤالنا المعتاد!!!!
ليه الأمهات مش بتشتغل مع عيالها ما قبل أكاديمي ؟!!!
1/ قلة وجود المتخصصين.
2/مفيش وعي بأهمية تنمية مهارات و ما قبل أكاديمي.
3/الوصمة ب أن الطفل طلما راح مركز يبقي عنده مشكلة - و دي فكرة خاطئة طبعاً لكنها منتشرة خاصة في المحافظة اللي فيها ارياف -
( لما بنأخد كورس دايما بلاقي المحاضر بيتجاهل المهارات العليا خاصة مع السنين الكبيرة لأن الطفل الطبيعي الكبير صعب يروح مركز هو مفيش فكرة تطوير مهاراته أصلا فبتالي أغلب تركيزنا ع الأطفال رغم أهميته للكبار) .
4/ ارتفاع سعر التكلفة - ع الرغم أنها مش مرتفعة ولا حاجة -
( الناس بتشوف دول شوية ألعاب و رسومات و أنشطة ليه نضيع وقتنا و فلوسنا المهم الواد يقرأ و يكتب زيه زي الباقي و خلاص)
تكلفة تنمية مهارات ( منتسوري) غالية لأن
- تكلفة الأدوات عالية .
- تكلفة الكورسات عالية.
- تكلفة الدراسات العليا عالية.
- الجلسات بتكون فردية حسب قدرات كل طفل ( علشان كدا مفيش حاجة أسمها حضانة منتسوري)

- أنا لا ذاكرت مجهود ولا وقت ولا إحتمال كسر الأدوات ولا تجديد الأدوات ولا إيجار ولا مياه ولا كهرباء......
هيجي حد و يقولي انتي مكبرة الموضوع ليه دي شوية رسومات و كلنا اتعلمنا مكنش في تنمية مهارات وقتنا يعني مين قال لحضرتك أن مكنش في تنمية مهارات وقتنا ؟!!
-كنا بنلعب حجلة في الشارع.
-كنا بنلعب نط الحبل.
-كنا بنلعب لعب تخيلي و تبادل الأدوار كنا بنمثل أننا مدرسين و دكاترة.
-مكنش في موبايل ولا شاشات و احنا عمرنا 8 سنين فما أقل ( كان تليفزيون واحد الأب بيسمع عليه ماتش و مصارعة و الأم بتسمع طبخ و برامج ف الطفل لو خد ساعة كان يبقي كتر خيره وقتها)
-كنا بنلعب كيك ع العالي كيك الواطي.
-كنا بنعمل سباق جري .
-كنا بنلعب صيد السمك.
-كنا بنقعد عيلة كدا و خالوا و جدو يقولوا فزورة و نكت و جمل طويلة احنا بنكررها......

هل الجيل دا مر بنفس الظروف علشان نقارن ؟!!! الإجابة لأ

****في فئة مظلومة ( الموهوبين) و دول أطفال متفوقين دراسياً و عقلياً بس الأهل بيكتفوا بأنه بينجح في المدرسة مع أن في أيدهم كنز بجد بيدمروا مهاراته و قدراته.
*** معلومة محدش يعرفها أن الطفل الموهوب قد يعاني من اضطراب التعلم المحدد ( صعوبات تعلم) في مادة معينة و هنا الأهل بترفض فكرة أن الإبن يعاني من صعوبات تعلم.
طب أنا شاكة أن أبني موهوب ( فائق الذكاء) أتأكد ازي ؟؟!
-----مقياس الذكاء و هو اللي بيحدد ( الأهل بيخضوا من فكرة اختبار ذكاء و هو دايما مربوط بذوي الاحتياجات الخاصة مع أن الطفل العادي ممكن يعمل عادي)

$$$$هل كنت تعلم أن الموهوبين من ذوي الاحتياجات الخاصة 🤓📝