من وقت ما انتشرت مصطلحات زي ال ADHD والتوحد وبقت في متداول الجميع
بقا الكل بيطلقها على أي طفل عادي جدًا ولا كأنه حد متخصص وفاهم جدًا
أطفال كتير بتتحول من الحضانات لمراكز تخاطب بشكوى إن الطفل عنده ADHD (فرط حركة وتشتت انتباه) وإن الطفل مبيقعدش أبدًا ومسبب مشاكل كتير
وأول ما تتكلم مع الأم في سبب الاستشارة أو الزيارة تقولك أصله عنده فرط حركة!!
ثواني وأنتم اطلقتوا عليه طفل فرط حركة بناءًا على أيه؟
هل أنتِ حد مختص؟ هل مدرسة الحضانة حد مختص؟
لا، يبقى ليه نظلم ولادنا بمسميات أكبر بكتير من مشكلتهم ..
ما طبيعي طفل وبيحب يستكشف كل حاجة حواليه، ولما يبقى في مكان فيه ألعاب ومثيرات كتير هيتشتت ويبقى عنده فضول يكتشف كل حاجة، وخصوصًا لو هو شقي.
معنى كدا إن في فرق كبير جدًا بين فرط الحركة وتشتت الانتباه ADHD والشقاوة(التصرفات الطفولية العادية):
*الأول الشقاوة عبارة عن أيه:
عبارة عن تصرفات طفولية طبيعية، الطفل بيستخدمها ليعبر عن حب الاستكشاف، وهي جزء طبيعي من نموه وتطوره.
الطفل الشقي بيكون طفل نشيط وحيوي لكنه قادر على السيطرة على طاقته لما يتطلب منه (يعني لما تقوله أقعد بيقعد عادي)
الشقاوة بتختلف عن فرط الحركة في أنها مبتأثرش على الأداء الدراسي أو التفاعل الاجتماعي للطفل بالسلب بالعكس كل حاجة طبيعية عادي، ممكن يتشقى أو يتدلع شويه لكن وقت ما يتطلب منه حاجة بيعملها عادي.
وفي الطبيعي الشقاوة حاجة عادية بيكتسبها أغلب الأطفال ومبتطلبش لا تدخل طبي ولا علاجي.
أما بقى فرط الحركة ونقص الانتباه
(attention-deficit/hyperactivity disorder - ADHD):
دا عبارة عن اضطراب تطوري عصبي وليس اضطراب سلوكي على الرغم من إن الأطفال المصابين بيه بيتصرفوا بشكل مفرط ومندفع.
وفي حالة الطفل المصاب بال ADHD، بنلاحظ إن الطفل دا:
١/يعاني من زيادة في النشاط وعدم القدرة على الجلوس بهدوء لفترة طويلة.
٢/يعاني الطفل من صعوبة في السيطرة على تصرفاته، وصعوبة في إنهاء المهام.
٣/يعاني من صعوبة في التركيز وعدم القدرة على إتمام المهام، ويبدو الطفل متشتتًا أو غير منتبه.
يظهر عادة في المواقف التي تتطلب تركيزًا عاليًا، مثل المدرسة.
*يحتاج لتدخل طبي واختصاصي، وغالبًا ما يحتاج لأدوية أو منبهات نفسية لجانب تنظيم بيئته وروتين حياته وكمان تعديل نمط الرعاية الأسرية.
*يحتاج إلى تدريب خاص واستراتيجيات لتحسين الانتباه والجلوس لفترات أطول والتدريب على زيادة القدرة على إتمام المهام.

ملحوظة كمان:
ممكن الطفل يبقى بيعاني من اضطراب تشتت انتباه (ADD) غير مصحوب بفرط حركة عادي جدًا وهنا الطفل بيبان هادي وقاعد عادي جدا لكن غير منتبه وتركيزه ضعيف ومشتت.
#Sayeda_Khader