أزاي اتعامل مع الرهاب الاجتماعي في إلقاء كلمة اوعرض، بلاقي دقات قلبي بتزيد وعدم التركيز والرجفة ...

الخوف من الكلام قدام الناس واحد من أكثر أنواع الخوف انتشارا في العالم – لست وحدك – تخيل يا مؤمن إنه بييجي في المرتبة الأولى أو الثانية في معظم الإحصائيات!! في دراست كثير لقوا إنه حتى بيسبق الخوف من المرتفعات أو الخوف من الموت.

بس ولا يهمك هديك دلوقتي شوية أفكار روعة، هتساعدك تبقي جاهز نفسيا وجسديا، كباية القهوة بتاعتك وركز معاية.

1. كن مستعدا
تخيل نفسك في العرض هادي ومركز ومتمكن، التخيل هيكسر الرهبة ويحسس عقلك إنك قادر تتعامل مع الموقف، عايز تقولي إننا هنقضيها تخيلات؟ لا يا صديقي زي ما استعديت نفسيا استعد فعليا:

أولا: حضر كويس: كل ما تكون متمكن من المحتوي كل ما هتحس بأمان أكثر وتوتر أقل. وثانيا: اتمرن اتمرن اتمرن: جرب في عيلتك وصحابك، أمال يعني هتدور على حد غريب، ولو منفعش اتمرن قدام المراية، التكرار هيحسسك بالراحة وانك مطمن.

2. سيطر على التوتر بالتنفس العميق
التنفس العميق هيساعدك تهدي أعصابك قبل وأثناء العرض، أول ما تلاقي دقات قلبك بقت عاملة زي دقات الطبلة على طول ركز على الشهيق والزفير. التكنيك ده بيشتت انتباهك عن التوتر.
فاكر خطة "4-4-6" شهيق 4 ثواني، احبس 4 ثواني، 6 ثواني زفير، ده هيهدي جسمك ويخلي نفسك متزن.

3. خلي لغة جسدك تزود ثقك
جرب كدة تبتسم ابتسامة عريضة وتبص للسماء وافتكر موقف يزعل، مش هتعرف تزعل، في علاقة قوية جدا بين وضع الجسم والمشاعر والأفكار، طالما الموضوع كدة امشي بخطوات ثابتة وخلي كتافك مرفوعة، كدة يا بطل هتدي للناس انطباع بالثقة والأهم هتوصل إشارة لعقلك إنك مرتاح. ولو بتحس بتوتر في ايديك جرب تمسك أي حاجة حاجة خفيفة زي ريموت أو قلم.

4. استخدم أدوات بسيطة تفكرك
لو خايف تنسى هتقول ايه بسبب القلق، بسيطة جهز النقط الرئيسية اللي ناوي تتكلم عنها واكتبها في بطاقات تذكير: اكتب النقاط الأساسية على بطاقات صغيرة، تقدر تبص عليها في العرض، وممكن تستخدم خريطة ذهنية، تساعدك في تقسيم الموضوع لاجزاء واضحة.

**5. انسى حاجة اسمها مثالية"
أنت عارف انت ليه بتكون حالتك تصعب على الكافر وانت بتقدم عرض قدام الناس؟ عشان خايف من الفشل، اتعامل مع الناس طبيعي زي ما بتتكلم مع أصحابك، محدش طلب منك تكون بيرفكت، ركز على الفايدة أو الفكرة اللي عايز توصلها، وياسيدي الناس غالبا بيكونوا متسامحين ولو حصلت غلطة صغيرة يعني "تيك ات ايزي".

وفي النهاية خليك طيب وحنين مع نفسك، وقول لنفسك كلمات لطيفة ومريحة قبل العرض وأثناء العرض، الكلمات الإيجابية هتفرق معاك، قال لنفسك: "أنا واثق إني هقدر"، أو "كل حاجة هتبقي تمام وزي الفل إن شاء الله".