يعني إيه الشلل الدماغي (Cerebral Palsy)؟

الشلل الدماغي هو إصابة بتحصل في دماغ الطفل وهو لسه في بطن الام، أثناء الولادة، أو بعد الولادة بفترة قصيرة.
الإصابة دي بتأثر على الحركة والتوازن، وأحيانًا الكلام والتواصل.

أسباب الشلل الدماغي:
نقص الأكسجين أثناء الولادة.
نزيف أو جلطات في مخ الجنين/الطفل.
التهابات شديدة للأم وهي حامل (زي الحصبة الألماني).
ولادة مبكرة قوي أو وزن قليل جدًا.
إصابة أو عدوى في المخ بعد الولادة (التهاب سحايا – خبطة جامدة).

الأعراض
شد أو تيبّس في العضلات (عضلات ناشفة ومشدودة).
تأخر في المشي أو الحركة.
حركات لا إرادية أو رعشة.
مشاكل في البلع أو الكلام.
ممكن ييجي معاه تأخر ذهني أو صعوبات تعلم في بعض الحالات.
العلاج والتأهيل
الشلل الدماغي مالوش علاج نهائي لأنه إصابة في المخ، لكن نقدر نحسن جدًا من قدرات الطفل ونخليه يعتمد على نفسه قد ما يقدر:
1. العلاج الطبيعي
تمارين عشان نفك الشد ونقوّي العضلات ونظبط التوازن
2. التخاطب
لو فيه مشكلة في الكلام أو البلع
3. العلاج الوظيفي
تدريب الطفل على الاعتماد على نفسه في الأكل، اللبس، مسك القلم
4. الأجهزة التعويضية
زي الجبائر أو الكرسي المتحرك أو المشّايات حسب حالة الطفل.
5. أدوية أو جراحة
في حالات الشد العنيف أو التقلصات الشديدة.

لو شخصنا بدري بنقدر ندخل في التدخل المبكر، وده بيفرق جدًا لأنه بيشمل:
العلاج الطبيعي علشان تحسين الحركة والتوازن.
التخاطب لتقوية اللغة والكلام والتواصل.
𝑆𝑝/𝑌𝑎𝑟𝑎𝐴𝑠𝑒𝑎𝑑