مساء الخير هكلم عن التأخر اللغوي.
كتير من الأمهات يسألوني
ابني اتأخر في الكلام.. دا طبيعي ولا محتاج تدخل؟
أول حاجة لازم نعرف إن:
الطفل الطبيعي يبدأ ينطق كلمات بسيطة حوالين سنة
عند سنتين يكون بيقول جمل من كلمتين زي "عاوز ميه"
عند ٣ سنين لازم كلامه يكون مفهوم للي حواليه بنسبة كبيرة

طب إمتى أقلق؟
لو الطفل عنده سنتين ولسه ماقالش ولا كلمة
أو عنده ٣ سنين وكلامه مش مفهوم خالص
أو بيستعمل إشارات بس ومش بيحاول يتكلم
أو بيبان عليه مش بيفهم التعليمات البسيطة

طب نعمل إيه!
نتكلم معاه كتير ونوصف كل حاجة حواليه
نقرأله قصص بصور ونخليه يشاركنا
نقلل التابلت والموبايل على قد ما نقدر
نلعب معاه ألعاب تفاعلية زي التخفي البازل العربيات
ولو لقيت العلامات اللي فوق لازم نزور أخصائي تخاطب للتقييم

أهم حاجة التدخل بدري بيفرق جدًا وكل طفل عنده فرصة يتطور لو اشتغلنا معاه صح

𝑆𝑝/𝑌𝑎𝑟𝑎𝐴𝑠𝑒𝑎𝑑