🧩✨ طيف التوحد... مش مجرد تشخيص، دي طريقة مختلفة لفَهم العالم.

👶🏻 طيف التوحد (Autism Spectrum Disorder) هو اضطراب نمائي بيأثر على مهارات التواصل، والتفاعل الاجتماعي، والسلوك. بيظهر غالبًا في أول ٣ سنين من عمر الطفل، وبيختلف من طفل للتاني… عشان كده بنسميه "طيف".

🌈 ليه اسمه طيف؟
لأن كل طفل على الطيف هو حالة فريدة! ممكن تلاقي طفل غير ناطق، وطفل تاني عنده لغة لكن مش بيعرف يدير حوار… وطفل ذكي جدًا لكن عنده صعوبة في التفاعل الاجتماعي. 👉🏻 فيه درجات ومستويات، وكل حالة بتحتاج خطة تدخل مختلفة.

🔍 أهم سمات طيف التوحد:

1. 🤝 صعوبات في التواصل الاجتماعي:
* قلة التواصل البصري.
* مش بيشارك اللعب أو المتعة مع اللي حواليه.
* صعوبة في فهم الإشارات الاجتماعية (زي الإشارة أو تعبير الوجه).

2. 🗣️ تأخر أو اختلاف في اللغة:
* ممكن يتأخر في الكلام أو يستخدم كلمات مش في مكانها.
* تكرار الكلام اللي بيسمعه (إيكولاليا).
* صعوبة في بدء أو استمرار الحوار.

3. 🔁 سلوكيات متكررة واهتمامات محدودة:
* حركات متكررة زي لف الإيد، هز الجسم، أو الرفرفة (flapping). "الرفرفة مش دايمًا معناها توحد، لكن ظهورها مع سمات تانية يستدعي تقييم متخصص."
* التحديق في أشياء بتلف أو بتتحرك.
* بيهتم بتفاصيل دقيقة جدًا.
* التمسك بروتين معين، وأي تغيير ممكن يزعجه.

📌 علامات الإنذار المبكر (قبل سن ٣ سنوات):
1. عدم الاستجابة لاسمه.
2. ما بيستخدمش الإشارة أو التلويح.
3. ما بيقلدش.
4. ما بيحاولش يجذب الانتباه.
5. فقد مهارات كان اكتسبها قبل كده.

🧠 طفل التوحد مش عنيد ولا مرفوض… هو بس بيفكر ويتواصل بطريقة مختلفة، ومحتاج حد يفهمه ويوصله بلغته.