لما الطفل يقولك ان ما حدش بيحبني او ما حدش عايز يلعب معايا 🥺
اوعي تقولي له 👌
لأ الكلام ده مش صح.... انت بس مش واخد بالك..... احنا كلنا بنحبك .. ما تقولش كده...... لأن كده هنوصل له رساله ان مشاعرك دي مش حقيقيه

وبلاش كمان نقول له.... علشان انت ولد جميل وشطور فاكيد هم غيرانين منك ومش عايزينك تبقى احسن منهم علشان كده هنوصل له ان المفروض لما هو يلاقي حد اشطر منه يتغاظ منه .....او هنوصل للولد مشاعر غرور وكبرياء احنا في غنى عنها

كمان مش حلو أقوله...... راجع تصرفاتك .....شوف انت بتعمل ايه غلط....... ما اكيد انت بتضايقهم..... او بتعمل لهم حاجه...... علشان كده هوصل للطفل فكره ان انت اللي فيك المشكله او هفقده ثقته في نفسه

️ امال اعمل ايه 🤔🤔

افهم الطفل ان طبيعي جدا انك هتقابل كل يوم في حياتك ناس كثير فيهم ناس هيحبوك.... وناس تانيه لأ.....

وعدم حبهم ليك ده مش معناه أبدآ ان انت ناقصك حاجه ....او ان انت مش كفايه ... او ان انت وحش.....
ومهم كمان اننا نعلم ولادنا ان ما يبقاش هدفهم في الحياه هو السعي لأخذ الحب والقبول من الناس اللي حواليهم... وان احنا مش بنتسول الحب من حد

انت غالي وليك قيمه وليك كرامه ❤️🤗
وده يخلينا احنا كمان في البيت نركز مع الطفل شويه ان احنا بنديله حب كفايه وقبول كفايه

لأن الطفل اللي بيحس بالحب والقبول جوه البيت وخصوصا من ماما وبابا بيحس ان العالم كله بيحبه وبيقبله .... والطفل اللي بيحس شعور الرفض والخزي جوه البيت بيحس ان العالم كله مش بيحبه ومش عايزه......

كمان حاجه اخيره محتاجه انا اخذ بالي منها شويه و أركز
هل ابني فعلا ممكن يكون ناقصه اي حاجه في المهارات الاجتماعيه او في مهارات التواصل عموما محتاجه اركز عليها المرحلة المقبلة