*🤍العلاج النفسي مش مجرد كلام مريح بنقوله علشان نهدّي العميل
واللي متخيل كده، محتاج يعرف إن الحقيقة أعمق بكتير🤍*

العلاج النفسي الحقيقي أشبه بـ المرآة
والمُعالج بيمسكها بلطف علشان يساعدك تشوف نفسك بوضوح
تفهم أفكارك اللي بتتعبك، وتشوف جذورها
مين ساهم في تشكيلها؟ إمتى بدأت؟ وليه لسه متمسك بيها لحد دلوقتي؟

ويمكن تكتشف إنك أحيانًا بترفض التغيير مش لأنك ما تقدرش
لكن لأنك بتحمي معتقد قديم
أو لأن فيه جزء جواك شايف الأمان في المكان اللي اتعود عليه، حتى لو كان مؤلم.

في جلسات كتير، الناس بتخرج وهي في حالة صمت أو انفعال
مش لأن الجلسة كانت صعبة، لكن لأنها كانت صادقة
وفيها مواجهة مع الذات ما كانتش متوقعة.

لكن الجلسة مش نهاية الرحلة…
فيه متابعات، مهام بين الجلسات، تمارين محتاج تلتزم بيها
وفيه خطة علاجية بتتصمم مخصوص علشانك، مش نسخة عامة
لأن كل شخص له طريقته في الفهم والتغيير.

العلاج مش دايمًا مريح، لكنه حقيقي
والهدف مش بس نريحك، بل نوصّلك لنفسك
تفهم مين إنت، وتعيش علاقات صحية، وتبني حياتك بمعنى أعمق.

الكلام وسيلة… لكن التغيير بيبدأ من لحظة صدق حقيقية مع الذات.