هل المربي محتاج يكون عنده ذكاء عاطفي ؟

قبل ما إن نقول الطفل لازم يتعلم يعبر عن مشاعره أو يفهم نفسه
وقبل ما نطلب من الطفل انه يكون هادي ومتزن ويعرف يواجه غضبه

لازم نسأل نفسنا إحنا ككبار
هل إحنا نفسنا عندنا ذكاء عاطفي

هل المربي بيعرف إمتى صوته كان عالي وهو متعصب وتعبان
هل بيعرف يفرّق بين التعب من الشغل والغضب من الطفل
هل بيعرف يقول أنا آسف
هل بيعرف يتكلم عن مشاعره قدام أولاده بأريحية وبساطة
ولا بيكون محرج يبان ضعيف في عينيهم
الذكاء العاطفي مش بس مهارة للطفل
هو أساس شخصية المربي
لأن اللي بيتمتع بذكاء عاطفي عالي
بيفهم إن التربية مش رد فعل لسلوك غلط عمله الطفل
ولا عقاب سريع لغلطة عملها الطفل
ولا صريخ يفرّغ بيه ضغط يوم شغل طويل
لكن لحظة وعي فيها إدراك لسلوك الطفل وفهم لمشاعره وتوجيهه عشان الطفل يعرف هو غلط في ايه فعلًا ويتعلم إيه المفروض يتعمل وإزاى ميكررش غلطه

طيب لو المربي ذكي عاطفيًا إيه اللي بيحصل ؟

البيت بيبقى أهدى
الطفل بيحس بأمان
حتى وقت الغلط عارف انك هتسمعه وتفهمه وتوجهه وتطلب منه ميكررش غلطة
الطفل بيكون عنده حدود وعارف امتى غلط وامتى هيتعاقب وامتى هيكافئ
علاقته بيك مش هتكون مهزوزة ومتوترة مش هيبقي محتار ايه رد فعلك لانه واثق فيك وحاسس بالآمان

الطفل اللي بيشوف مربي ذكي عاطفيًا
هيتعلم إن مشاعره مش خطر
وإن التعبير عنها مسموح في اي وقت وبأريحيه وفي نفس الوقت بحدود
من حقي اقول انى غضبان بس مش من حقي اكسر وازعق
لما تكون صادق في مشاعرك
هتفتح لطفلك باب إنه يكون صادق في نفسه

مش لازم تكون مثالي ومبتغلطش
لكن خليك واعي
مشاعرك مش عيب عادي توضحها وتعبر عنها لان ده هيساعد طفلك بشكل كبير يعبر عن مشاعر

ولو عايز تربي طفل ذكي عاطفيًا
ابدأ بنفسك