من كام يوم طلعت فنانة مشهورة قالت إنها مش مع التربية الحديثة
وقالت إنها مؤمنة بالشبشب وبالضرب
علشان ابنها يطلع راجل
بس السؤال
هو الضرب فعلًا بيطلّع راجل
ولا بيطلّع طفل مكسور هش من جوه بيحاول ينشف ويقوي علشان يبان راجل
اللي بيضرب مش بيعلّم
اللي بيضرب بيخوف
والخوف مش بيخلي الطفل أقوى
الخوف بيخليه يتقوقع
يكدّب
يخبّي
يتعوّد إنه يرضي عشان ينجو
مش لأنه فاهم أو مقتنع

الطفل اللي بيضرب مش بيحترم أهله
هو بيخاف منهم
ولو خاف وهو صغير
هيقلد ده وهو كبير
إما هيمشي على نفس السكة
ويضرب
أو هيتحول لشخص بيسمح للناس تأذيه
علشان اتعود إن الحب ييجي بعد الألم
وإن الأمان ييجي بعد العقاب

الضرب ما بيصنعش رجالة
اللي بيصنع الرجولة الحقيقية
هو الاحترام
هو الاحتواء
هو التربية اللي فيها وضوح وحدود من غير عنف
هو إنك تعلّم ابنك يعبر عن نفسه
ويتقبل الخطأ
ويفهم العواقب
من غير ما يتهز من جواه

اللي بيتربى على الضرب
مش هيفهم يعني إيه نقاش
ولا يعني إيه اعتذار
ولا يعني إيه يسمع حد مختلف عنه
لأنه اتعود إن الصوت العالي هو اللي يكسب
وإن الوجع هو وسيلة التصليح

والمصيبة الأكبر
إنه هيحس إنه يستحق ده
وهيكرر نفس الدور مع اللي بعده
وينقل العنف كأنه ميراث

الطفل اللي بيتربى من غير ضرب
مش طفل مدلل ولا هش
هو طفل فاهم نفسه
فاهم غلطه
وعارف إنه حتى لو غلط
لسه محبوب ولسه ليه قيمة
في الآخر

مفيش طفل خرج من الضرب أقوى
فيه أطفال خرجوا ساكتين
وخايفين
وبيضحكوا بس عيونهم مطفية
وبيكبروا وهم فاكرين إن القسوة تربية
وإن الرجولة تعني إنك تتوجع وتسكت
إنك تتألم ومتبكيش عشان انت راجل

عايز تربي راجل
ربّيه على الاحترام
على التعبير
على ضبط النفس
على إنه يقف قدام الخطأ من غير ما يحتاج يكسر حد
ولا حد يكسره