ما هو التحليل السلوكي التطبيقي (ABA) للأطفال: كل ما تحتاج معرفته

انهارده هنتكلم عن التحليل السلوكي التطبيقي (ABA)

هو واحد من أهم وأشهر الطرق اللي بنستخدمها في تعديل سلوك الأطفال، وخصوصًا اللي عندهم تحديات زي اضطراب طيف التوحد. طيب إيه هو ABA بشكل مبسط؟ هو علم بيشتغل على فهم وتغيير السلوك من خلال أساليب مدروسة، بيعتمد على فكرة إن أي سلوك عند الطفل ممكن يتعدل أو يتغير لو عرفنا إيه اللي بيحفزه.

المبادئ الأساسية في ABA:
•التحليل الوظيفي للسلوك: يعني بنراقب السلوك، بنفهم ليه الطفل بيعمله، وإيه اللي بيحصل قبل وبعد السلوك. ده اللي بيسموه (ABC):

•A - المثيرات (اللي بيحصل قبل السلوك).
•B - السلوك (اللي الطفل عمله).
•C - النتيجة (إيه اللي حصل بعد السلوك).

•التعزيز الإيجابي: لو الطفل عمل سلوك كويس، بندعمه ونكافئه عشان يشجعه يكرره. زي لما نقول “برافو عليك” أو ندي هدية بسيطة.

•التعزيز السلبي: مش معناه العقاب، لكن معناه إننا نشيل حاجة مش كويسة للطفل لما يعمل سلوك كويس. زي لو طفلك حس بعدم راحة بسبب حاجة معينة، وإنت شيلت السبب ده لما تصرف بشكل كويس.

•التجاهل المنظم: أحيانًا لما الطفل يعمل سلوك غير مرغوب فيه، التجاهل بيكون طريقة للتعامل معاه بشرط إنه ما يكونش خطر، وده بيقلل من تكرار السلوك.

الجلسات في ABA بتتكون من إيه؟
•جلسات منظمة: بتكون في بيئة معينة زي البيت أو مركز، وفيها خطة واضحة لتحقيق أهداف سلوكية محددة.

•تدريب على المهارات: زي التدريب على التواصل، المهارات الاجتماعية، المهارات الأكاديمية وحتى مهارات العناية الشخصية.
•التكرار والمراجعة: بنشتغل مع الطفل بشكل متكرر علشان المهارات تترسخ وتبقى جزء من حياته اليومية.

فايدة التحليل السلوكي التطبيقي:
•بيساعد في تحسين التواصل.
•بيعزز المهارات الاجتماعية.
•بيقلل من السلوكيات الغير مرغوبة.
•بيعلّم الطفل مهارات جديدة تخليه يقدر يتفاعل مع البيئة حواليه.
خليك فاكر:
التعامل مع الأطفال من خلال ABA بيحتاج صبر، مثابرة، وفهم لاحتياجات كل طفل. الأسلوب ده بيكون فعال لما بنلتزم بالخطة ونفهم إيه اللي بيحفز كل طفل عشان نوصل لأفضل نتيجة.
يارب تكونو إستفدتو❤️😊

✍️Mr /Hossam Hassan
أخصائي الإعاقة العقلية والتوحيد