ابني مبيسمعش كلامى وعلى طول بيعند معايا

أمهات وآباء كتير بيحسو إنهم فشلو في تربية ولادهم وبيحسو بالإحباط لما بيلاقو طفلهم بيصمم على طلبه أو بيعند معاهم أو حتى بيتجاهل مطالبهم

لكن هي فعلًا المشكلة في الطفل ولا في أسباب محتاجين نفهمها قبل ما نقابل " عند وسلوك الطفل الخاطئ " بعقاب

أول حاجه لازم أعرف هو طفلي فعلًا عايز يعاند معايا ؟
العناد الحقيقي سلوك مقصود ومتكرر بيقوم بيه الطفل علشان يتحدي أهله لكن في أغلب الأحوال اللي بنسميه عناد ما هو إلا محاولة من الطفل علشان
يكون مستقل
يعبر عن نفسه
يجذب الإنتباه
أو بيكون رد على الطلبات والضغط الزايد عن الحد

ليه طفلي مش بيستجيب للأوامر والطلبات ومش بينفذها
١ - لأن أسلوب التوجيه والطلب مش صح ومش مناسب
الأوامر المتكررة، الصوت العالي، التهديد، أو الطلبات وقت لعب الطفل أو وقت راحته كل ده بيخلي الطفل يتجاهل ويرفض بس من غير قصد ٢- إن الطفل حاسس بعدم تقدير
لما بيعمل حاجه صح بدل ما نشكره و نشجعه بنعدل على كل حاجه بيعملها
٣- إنه بيحس أهله متحكمين في كل حاجه وهو ملوش الحق في الإختيار ومش قادر يتحكم في حياته
من حقه يختار ( أكله ، لبسه ، نوع العصير ، رياضه معينه يلعبها ) في إطار قوانين البيت
٤- عدم وضوح الطلب يعمل إيه و إمتى و إزاي
( لازم الطلب يكون واضح وبسيط مش معقد ونحدد إحنا عايزين إيه لإن مدة إنتباه الطفل قصيرة ومش بيركز في تفاصيل كتير )
٥- مفيش قوانين وروتين ثابت في البيت
لازم يكون في وقت للعب ، للأكل ، للنوم بجداول وحدود واضحة نتفق عليها من البداية ونلتزم بيها
٦- بيقلد سلوكيات الكبار
صراخ الأم والأب ( بيعاندو وبيصرخو عشان ينفذوا اللي عايزينه هيفهم إن دي الطريقة الصح اللي هلجألها لما أكون عايز حاجه )
٧- مشاكل في العلاقة بين الطفل وأهله
( بعد عاطفي وإهمال فبيعاند علشان يجذب الإنتباه أو ينتقم لنفسه )

إزاي اتعامل مع السلوك ده :
١- كون علاقة طيبة مع طفلك
الطفل المحبوب والمسموع بيستجيب للأوامر بشكل أفضل
خصص وقت للّعب والكلام مع طفل

٢- اختاري الوقت المناسب والكلمات
متطلبيش منه حاجه وهو مشغول
استخدمي جمل قصيرة وواضحة ولطيفة ( بعد ما تخلص لعب تعالي نغسل إيدينا )
٣- خليه يختار
تحب تلبس ده ولا ده
بيحس إنه متحكم في حياته وليه حرية الإختيار
٤- ثبتي قوانين بتتطبق في البيت
لازم الطفل يحس إن البيت ليه حدود وقواعد ( وقت الأمل ، النوم )
٥- اتكلمي معاه بصيغة التعاطف بدل التهديد
(أنا حاسه بيك وعارفة إنك عايز تلعب وقت أطول بس ده هيتعبك بكرة هنكمل لعب)
٦- متصرخيش وتكرري الطللب بشكل مبالغ فيه
خليكي هادية لأن أوقات كتير الطفل بيتجاهل الصوت العالى
قربي منه وطبطبي عليه وأطلبي منه
وافتكري دايمًا إن الطفل مش نسخة مصغرة مننا هو كائن مستقل ليه مشاعر وإحتياجات وطلبات لما بنهتم بيه ونسمعله بنفتح باب للحب بدل الصراعات