"ابني عصبي أتعامل معاه أزاي؟!"

لو ابنك بيتعصب بسرعة وبيصرخ أو يضرب، قبل أي حكم عليه ادرسي الأسباب اللي بتعصبه الأول، الحل مش في العقاب أو الزعيق، لكن لازم تعلميه أزاي يعبر عن مشاعره صح، عندك طرق كتير علشان تتعاملي معاه بيها ومنهم:

1️⃣ اللعبة السحرية:
بدل ما تقوليله "اهدى بقى!"، حولي الهدوء لتحدي ممتع:
"يلا نشوف مين هيفضل هادي أكتر وقت؟ اللي يكسب ياخد نجمة!"
"تعالى نرسم العصبية، شكلها إيه؟ لونها إيه؟"
اللعب بيساعده يفرّغ غضبه بطريقة إيجابية بدل الصويت والصراخ والتكسير.

2️⃣ ركن التهدئة:
جهزي مكان مريح بعيد عن العقاب فيه كراسة تلوين، قصة، أو لعبته المفضلة. لما يتعصب، قوليله:
"تحب تروح ركن الراحة شوية وترجع تحكيلي؟"
مع الوقت، هيتعلم يهدى بنفسه بدل ما ينفعل.

3️⃣ الاستماع الفعّال:
الأطفال بيتعصبوا لما يحسوا إن محدش فاهمهم. بدل ما تقولي "متعيّطش على حاجة تافهة!"، اسمعيه وعبّري عن تفهمك:
"أنا سامعاك… إحكيلي إيه اللي مضايقك؟"
"أنا فاهمة إنك زعلان، تحب نحاول نحل المشكلة سوا؟"
لما يحس إنك مقدراه، غضبه هيقل وهيبدأ يتكلم بدل ما ينفجر.

4️⃣ التأجيل بدل الرفض:
لو طلب حاجة مش في وقتها واتعصب لما رفضتي، جربي:
❌ "لأ وخلاص!"
✅ "مش دلوقتي، بس نقدر نعملها بعد الغداء، متفقين؟"
ده بيخليه يحس إنك مش بتمنعي، لكن بتأجلي بطريقة ذكية.

5️⃣ زر الإيقاف:
علميه إنه عنده زر إيقاف داخلي يتحكم في مشاعره، جربي معاه تمرين بسيط:
"لما تحس إنك هتتعصب، دوس على زر الإيقاف، خد نفس، عدّ لحد 5، فكر، وبعدين قرر هتتصرف إزاي."
ده بيساعده يتعلم التحكم في نفسه مع الوقت.

في الأول وفي الآخر ابنك محتاج بيئة صحية، محتاج مشاعره تتفهم ويبقى في لغة حوار وتواصل بينه وبينك وكل مشاكله هتزول وتتحل.
#ابني_وسلوكه