التعزيز التفاضلي (differential reinforcement):
(من مواضيع الامتحان المهمه جدا)

هو تعزيز استجابه او عدد من الاستجابات بالتزامن مع اطفاء استجابه اخرى او عدد من الاستجابات الاخرى عشان نقلل سلوك معين.

بالعاميه كده هتعزز سلوك عشان سلوك تانى يقل
وبنستخدم التعزيز التفاضلي احيانا كبديل للعقاب للى هو انا عايز اقلل سلوك غير مرغوب فيه عن طريق تعزيز سلوك اخر مرغوب فيه.

انواع التعزيز التفاضلى:

*التعزيز التفاضلى للسلوك البديل (DRA):

يعنى لو انا عندى ولد بيضرب لما يعوز ياخد اللعبه من زميله فى الفصل انا هتجاهل السلوك ده وهعزز اى سلوك تانى صحيح الطفل يعملو عشان ياخد اللعبه من زميله
يعنى اعزز انه يسال المدرس ممكن اخد اللعبه من فلان او لا

او اعزز سلوك ان هو يروح يطلب من زميله على طول

او اعزز سلوك الانتظار مثلا انه يستنى زميله يخلص لعب وياخد اللعبه.

يعنى فى الاستراتيجيه دى تعزيز اى سلوك ايجابى بديل عن السلوك السلبى.

*النوع التانى هو تعزيز السلوك النقيض: (DRI)

هو هو الDRA بس السلوك اللى هتعززه هيكون متحدد شكله بالظبط مش اى سلوك ايجابى بديل وخلاص
هنا انت هتحدد سلوك نقيض للسلوك السلبى واللى مينفعش يحصل فى نفس الوقت اللى بيحصل فيه السلوك السلبى.

يعنى ايه؟
تعرف تحط ايدك على راسك وانت بتصقف؟

طب تعرف تصقف وانت حاطط ايديك الاتنين فى جيب البنطلون ؟

تعرف تغنى وانت بتشرب مايه؟

هو ده الDRI انك تختار سلوك بديل مستحيل حدوثه فى نفس وقت السلوك السلبى يعنى ياده يحصل ياده يحصل لكن الاتنين مع بعض مينفعوش فى نفس اللحظه.

باقى الانواع فى البوست اللى جاى