من باب صدقه العلم.
لما اجي اشتغل تعديل سلوك مع اي حاله مشتغلش من غير اساس عندي اللى هو بالبركه كده، لا لازم يكون عندي اساس وخطوات ماشي عليها ما هي مش بزرميط ياصاحبي.
اول حاجه هتحدد السلوك اللي عاملك مشكله وتقيس عدد مرات حدوثه سواء معدل زمني او مرات التكرار، بعد كده هنعمل حاجه اسمها تحليل سلوك تطبيقي اللي هو Applied Behavior Analysis اللي هي ABA طيب لزمته اي ده؟!
لزمته هنا ان عشان اتعامل مع السلوك لازم اشوف الحاجات اللي بتؤثر عليه والحاجات دي عندي نوعين اما Antecedents of behavior او سوابق السلوك يا اما Consequences of behavior اللي هي توابع السلوك، من خلال تحكمي ف الاتنين دول بقدر اعمل تعديل السلوك اللي انا عايزه، بس كده؟ لا مش بس
بعمل اي كمان؟
بعمل حاجه اسمها The baseline of current behavior خط قاعدي للسلوك الحالي اللي بيعمله الطفل، طيب ده هيفيدني ف اي؟!
هيفيدني ف اني اعرف انا شغال صح ولا غلط والاستراتيجيه بتاعتي شغاله ولا اشوف غيرها.
طيب اي هي الاستراتيجيات اللي ممكن اشتغل بيها تعديل سلوك؟!
عندي استراتيجيات كتير جدا هنقول منها مثلا
التعزيز، العقاب، الاطفاء، التشكيل، التسلسل، النمذجه.
وغيرها كتير من الاستراتيجياات هتكلم عنها بالتفصيل بعدين باذن الله.
وبعد كده عندك بقا اني اقيم السلوك بعد الخطه العلاجيه واني اعممه، وبكده اقدر اقولك انك شغال صح وانك تفرق عن كتير غيرك.