📖 مهارات السرد والوصف عند الأطفال… مش بس عشان يحكوا قصة، دي لبنة في طريق اللغة والتفكير!

في كتير من الأمهات تقولك:
"ابني بيتكلم كويس، بس لما أقوله احكيلي عن يومك، يسكت!"
"بنتي بتحفظ القصة، لكن مش بتعرف تحكيها لوحدها!"
"بيقول حاجات متلخبطة… ومش بعرف أفهم هو يقصد إيه!"

وهنا بيظهر سؤال مهم:
هل الطفل عنده مهارات سرد ووصف؟
ولا هو بيتكلم كلام كتير من غير ما يعرف يبني جملة كاملة فيها معنى وترتيب وتفاصيل؟


---

🎯 مهارة السرد = إن الطفل يعرف يحكي اللي حصل، أو يعيد حكاية قصة، أو يوصّف شيء، أو يحكي عن فكرة... بجمل واضحة، مترابطة، مفهومة.

دي مش رفاهية.
دي المهارة اللي بتخلي الطفل يكتب موضوع تعبير،
ويجاوب على سؤال "إشرح"،
ويشارك في حوار،
ويفكر بصوت مسموع،
ويعبر عن نفسه، عن احتياجه، عن ألمه، عن رأيه، عن حقه.


---

💬 طيب… إيه الفرق بين السرد والوصف؟

🧵 السرد: إن الطفل يحكي تسلسل أحداث (حصل إيه؟ وبعدين؟ وبعدين؟).

🎨 الوصف: إن الطفل يقدر يوصف حاجة (شكل، لون، إحساس، مكان، شخص، مشهد...).


الطفل اللي مش بيعرف يوصف، هتفضل لغته سطحية.
والطفل اللي مش بيعرف يسرد، هتفضل أفكاره مفككة.


---

🧠 السرد والوصف بيتعلموا؟
أيوه… بيتعلموا خطوة خطوة، وبالطريقة الصح، وبالبيئة الداعمة.


---

✨ إزاي نطور مهارات السرد والوصف؟

1. 📚 احكي للطفل قصص يوميًا
مش عشان بس يستمتع… لأ، عشان يتشبع ببنية القصة (بداية – وسط – نهاية).
كل مرة احكي قصة، اسأليه بعدها: حصل إيه؟ وبعد كده؟ مين كان البطل؟ إيه أكتر حاجة عجبتك؟


2. 🔄 اللعب بإعادة السرد
احكي له قصة قصيرة، وبعدها خليه يعيدها بطريقته، ولو نسِي، ساعديه بأسئلة:
– وبعدين حصل إيه؟
– طيب مين كان في القصة؟
– لو انت مكان البطل، كنت هتعمل إيه؟


3. 🎲 أنشطة الوصف الممتعة
فرجيه صورة واطلبي منه يوصف:
– شايف إيه؟
– إيه الألوان؟
– شايف ولد بيعمل إيه؟
أو خليه يوصف لعبة، أكل، أو حتى لبسك!


4. ✍️ اللعب بالكلمات
اعملوا سوا لعبة "وصفيلي من غير ما تقولي اسمه":
مثلاً: وصفيلي البطيخة من غير ما تقولي "بطيخة" – لونها إيه؟ شكلها؟ طعمها؟


5. 🪞 النمذجة Modeling
لما الطفل يقول "هو دا راح هناك وجاب دا وكده"، قولي:
"آه، تقصد إن الولد راح السوق واشترى موز، صح؟"
كده بنعيد صياغة كلامه بطريقة أوضح، فيتعلم يبني جمل أحسن.


6. 🎭 الدراما والتخيل
العبوا "تمثيلية صغيرة" عن يوم في الحديقة، زيارة للدكتور، مغامرة في الغابة…
ده بيساعد الطفل يفكر، يوصف، يربط، ويتكلم بجمل.




---

🚸 الطفل اللي بيعرف يسرد ويوصف، هو طفل لغته نامية، وتفكيره مترابط، وقدرته على التعبير قوية.
ولما يكبر، مش هيخاف يقول رأيه
ولا يعاني في التعبير عن نفسه
ولا يتلخبط في الحكي، أو يبان أقل من اللي هو عليه فعلًا.


---

🧩 مهارة السرد والوصف مش بتتولد، دي بتتبني.
وفي كل قصة بتحكيها لطفلك، أنتِ بتبني حكاية جوّا دماغه…
وفي كل حوار معاه، بتطوري طريقة تفكيره.

📝 البيدچ: أصل الحكاية: نُطق ووعي
✍️ كتابة: أمنية ياسر