#الطفل_الداخلي_الجريح❤️‍🩹
"أحياناً، مش إحنا اللي بنختار العلاقة…
ده جُوانا طفل مجروح هو اللي بيختار."

في أعماق كل واحد فينا، فيه "طفل داخلي"
الطفل ده بيحمل جروح وأحاسيس وتجارب فاتت…
ممكن يكون:
-اتحرم من الاحتواء
-اتعرض للرفض
-اتكسرت ثقته في الناس
-أو عاش في بيئة فيها خوف، أو تجاهل، أو قسوة
💭 الطفل ده عمره ما نسي…طالما لم يحدث تعافى،
لسه جواه صوت بيقول:
"أنا مش محبوب"
"أنا مش كفاية"
"أنا هتساب لو ما أرضيتش الناس"

🧠 طيب، إيه علاقة ده باختياراتنا في العلاقات؟
الطفل الجريح اللي جوانا… بيظهر وقت الحب.
ليه؟
لأنه بيشوف في العلاقة فرصة إنه يتشاف أخيراً، يتحب من غير شروط، يلاقى اللي كان محتاجه زمان.

لكن المشكلة؟
إنه بيدوّر على "أب" ما حبّهوش، أو "أم" ما فهمتوش… في صورة شريك.
وبيفكر بعقلية طفل:
"لو اتعلقت بيك ومشيت، يبقى أنا السبب."
"لو أرضيتك، هتحبني."
"لو فضلت أدوّر عليك وأستحملك، هتفضل جنبي."

👇 إزاي بيأثر الطفل الجريح على اختياراتنا؟
1️⃣ نختار علاقات غير آمنة، ونتمسك بيها بشدة
حتى لو الطرف التاني مؤذي… نحاول نغيّره، مش نسيبه:
كأننا بنعيد تجربة الطفولة: "هفضل أحاول لحد ما آخد الحب اللي ماخدتوش زمان"
2️⃣ نبالغ في التضحية والرضا:
نرضى بالقليل… أو نلغي نفسنا بالكامل
لأن الطفل جوانا مقتنع إنه ما يستحقش أكتر
3️⃣ نُصاب بالتعلّق المرضي:
نحس إننا بننهار لو التاني بعد، أو تجاهل، أو اتغير
ليه؟ لأننا بنعلّق كل إحساسنا بالأمان عليه.
4️⃣ نكرر نفس النمط في كل علاقة:
نختار نفس النوع من الأشخاص اللي بيجرحونا
لأن العقل الباطن بيحاول "يصلّح" الجرح الأول… بس بطرق خطأ.

🎯 طيب نعمل إيه؟
1️⃣ اعترف: جوايا طفل مجروح:
أول خطوة هي الاعتراف… إني مش "ضعيف" أو "درامي"، أنا بس موجوع من زمان
2️⃣ ارجع للطفل ده:
اسأله: كنت محتاج إيه؟
هل كنت عايز حضن؟ اهتمام؟ سماع؟ طمأنينة؟
وابدأ تديله ده… منك، ليك.
3️⃣ افصل بين مشاعر الطفولة ومواقف الحاضر
مش كل خلاف مع الشريك يعني "أنا مش محبوب"
مش كل رفض يعني "أنا اتساب تاني"
4️⃣ اشتغل على الترميم الداخلي;
مش لازم العلاقة تشفيني… ممكن تكون مراية بس
والعلاج الحقيقي يبدأ لما أختار أحب نفسي وأداويها… من جوايا.

💬 "مشكلتك مش في الشخص اللي حبيته…
مشكلتك في الطفل اللي كان نفسه يتحب، فدخل العلاقة على أمل يلاقي اللي اتحرم منه."

✅ العلاقة السليمة تبدأ لما نحتوي الطفل اللي جوانا
نسمعه… ونطبطب عليه
ونقوله:
"أنا معاك… ومش هسيبك، حتى لو العالم كله مشي

#مريم_احمد✍️