ما هي سرعة الكلام عند الأطفال؟ الأسباب، العلامات، والعلاج بالتفصيل

مساء الخير هكلم عن السرعه في الكلام عند الأطفال .

يعني إيه السرعة في الكلام؟
السرعة في الكلام مش مجرد إن الطفل يتكلم بسرعة وخلاص، لا..
بيبقى كلامه مش واضح، يبلع حروف أو مقاطع، يقطع الجملة، يخلي اللي قدامه مش فاهم.
وساعات يبان زي التلعثم، بس الفرق إن اللي عنده سرعة كلام بيجري في الكلام من غير تنظيم.

أسبابه
1. عوامل عصبية: اضطراب في تنظيم الكلام داخل الدماغ.
2. عوامل وراثية: ممكن يكون في العيلة حد عنده نفس المشكلة.
3. قلة الوعي بالكلام: الطفل مش واخد باله إن كلامه مش واضح.
4. الاندفاع: شخصيته سريعة ومندفعة في التفكير والكلام.

👀 تلاحظ إيه على الطفل؟
يتكلم بسرعة جدًا.
يحذف حروف أو مقاطع.
جُمَله مش مترتبة.
كلامه ساعات يبان ملخبط أو غير مفهوم.
مش بياخد نفس أثناء الكلام.

العلاج:
العلاج الأساسي تخاطب
1. تدريب على الوعي بالكلام: أخلي الطفل يسمع تسجيل صوته ويلاحظ مشاكله.
2. إبطاء الكلام: نستخدم عدّ بطيء أو طرق زي (كلمة–نَفَس–كلمة).
3. تدريب على مخارج الحروف: عشان يوضح كل صوت.
4. تنظيم الجمل: نخليه يتكلم جملة قصيرة واضحة قبل ما يدخل في اللي بعدها.
5. تمارين تنفس: عشان ياخد وقفات صح.
6. التشجيع والهدوء: نتجنب التصحيح المستمر اللي يضايقه.

دور الأهل:
متستعجلوش الطفل وهو بيتكلم.
اسمعوا له باهتمام حتى لو كلامه مش واضح.
شجعوه على الحكي بالراحة من غير مقاطعة.
اعملوا ألعاب تعتمد على الكلام البطيء زي حكاية بالصور

𝑆𝑝/𝑌𝑎𝑟𝑎𝐴𝑠𝑒𝑎𝑑