سؤال ديما بيجي من الامهات
أزاي اعرف المركز او الأخصائي شغال كويس او صح ؟

خليني أكون أيجابي ونقول المفروض يحصل ايه !!

المقابله الاول
هي نقطة التعارف بيسمع منك شكوتك وانت بتسمع منه الخدمات المقدمه وبعدها تشوفوا هل مناسبين لبعض ولا لاء ( زي الرؤية الشرعيه كده )

دراسه الحاله
بيتم تطبيق دراسه حاله ودي بتكون عباره عن أسئله عن الماضي في حياة ابنك منذ الميلاد وتشمل الجوانب ( صحي . نفسي . سلوكي . مهاري. ذاتي )
من الاخر هي القاعده الاساسية ( فرشة الخرسانه ال هنبني عليها )

التقييم والخطه
هيكون في اول شهر بيتم تقييم الولد في كل المجالات او حسب تخصص المركز او الاخصائي ولما يخلص تقييم يعرض عليك الخطه والاهداف ال هتشتغلوا عليها وممكن تقوله ابني بيعرف الهدف ده وده مش يقلل منه لان ممكن الولد مأظهرش نتيجه في التقييم يبقي نسيبه كمراجعه وتأكيد بس برضوا مينفعش الاقي اكتر من 30% من الاهداف أبني اصلا بيعرفها

المتابعه
بيكون عباره عن كراسه بيتسجل فيها كل يوم الاهداف بتاعت ابنك ال اشتغل عليها ومدي تطوره فيها
ليه كشكول المتابعه مهم
علشان ده ال هيوضح لينا بشكل علمي مدي تطور النتائج
يعني ممكن تكون النتيجه في سرعة الاستجابه او زيادة عده الاستجابات او الانتقال من مساعده كليه لمساعده جزئيه
من الأخر هتقدر تشوف كل صغيره وكبيرة في تطور أبنك ومش هضيع وقته وعمره وبعدين تكتشف ان مفيش نتيجه

المشاركه
ودي بتم بعد تاني شهر من وجود ابنك بالمركز وبتكون عباره عن زيارتك للمكان مره او مرتين بالشهر تحضر فيهم الجلسات الفرديه مع أبنك أو تشارك الجلسات الجماعيه لو أمكن
منها هتشوف أبنك وتطوره صح ومنها كمان هتتعلم ازاي بيشتغلوا علي الاهداف و علشان تراجع معاهم وبرضوا خليك رحيم ومتعلقش علي كل حاجه خلي تعليقك ديما علي الأهداف وشغل ابنك فقط ولا تصور اولاد تانيه في المكان ولا تسال عن حالتهم وراعي خصوصيه المكان

التقرير
بيتم كل ثلاث شهور والشهر الاول بتاع التقييم مش محسوب منهم و بيتكتب فيه مدي تطور ابنك وايه المهارات ال اكتسابها ومن حقك تعرف ليه ابنك مكتسبش اكتر ويكون التقرير موضح كل حاجه

وعلشان نبقي منصفين خلينا نقول دور كل واحد حسب المجال ال شغالين عليه ( من وجهة نظري )

المعرفي والتخاطب
دور الام 50% ودور المركز 50% مناصفه بينكم لان اللغه بتتبني مش بتتحفظ

رعاية الذات
دور الام 60% دور المركز 40%

الاجتماعي
دور الام 70 % ودور المركز 30%

الاكاديمي و الحركي
دور الام 20 % دور المركز 80%

الجانب السلوكي
لو السلوك بيحصل بالبيت دورك 80% والمركز 20%
لو بالمركز هيكون العكس

الخلاصه
لو المركز او الاخصائي مش شغال بالطريقه دي معاك علي طول انت عارف هتعمل ايه
وأنت ماشي وضح لصاحب المكان انت مشيت ليه علشان يفهم ان الناس فاهمه ويصلح من نفسه