كل يوم معلومة جديدة ✌

الطفل العنيد 🙂

ليه الطفل بيعند؟ 🤔 لأن شخصية الطفل العنيد بتكون قوية، وذكي، وقائد، ومش سهل حد يعتدي عليه، ومش بيسمح لحد يضحكه عليه أو يجبره على حاجة هو مش عايزها. ده مهم طبعًا، لكن العند ده ممكن يظهر في البيت، ومش بيسمع الكلام، وكلامه هو اللي لازم يمشي، ولسانه متثبت عليه كلمة "لا":

* لا، مش عايز أذاكر.
* لا، مش هانام.
* لا، مش عايز أغسل أسناني.

ولو حد قاله "لا"، بيتعصب ويعيط وينام على الأرض، ومش بنعرف نتكلم معاه كلمة واحدة.

إيه الحل؟ 🤔

في أمهات بتستخدم أسلوب العكس، وده أكبر غلط! يعني الأم عايزاه يذاكر، تقوله: "متذاكرش"! ده بيعمل للطفل خلل بين الصح والغلط، ولو الطفل اكتشف الموضوع ده، مش هيثق فيكي تاني.

🖇 بلاش كلمة "لا" تتكرر كتير من الأم، بلاش تقولي "لا" على الصغيرة قبل الكبيرة. ليه؟ لأن طفلك بيتعلم منكِ، وهو بيتعلم منكِ إزاي تقولي "لا"، والرفض الكتير بيحسس الطفل إنه مخنوق، فيقوم يعند على أي حاجة.

🖇 الطفل العنيد مش عايز أمر 🗑، نخليه سؤال حلو كده:

* هتذاكر أمتى؟
* هتعمل واجبك أمتى؟
* هتغسل أسنانك أمتى؟

الطريقة دي بتخلي الطفل يفكر ويشغل عقله بطريقة صح، ويبدأ يرد على الأم بطريقة صح، وبيحس إنه صاحب القرار.

🖇 كتير من الأمهات متعرفش الطفل إلا وقت السلوك الغلط، لكن وقت السلوك الصح بتشوف إن ده الصح. يعني إيه؟ الصح عندكِ خلاص بقالك سنين متعودة عليه، لكن الصح عند طفلك سلوك بيتربى عليه لسه، بتزرعي فيه السلوك، والاستمرار عليه.

الاستمرارية تجيبها منين؟ من التشجيع يا مامي 😌. لأن في أطفال ممكن تعند وتعمل سلوك غلط، بس علشان حضرتك تشوفيه ويلفت انتباهك وتركزي معاه.

🖇 فبلاش نوصف الطفل كل شوية: "أنت عنيد! أنت عنيد! أنت عنيد!" إحنا اللي بنوصف ولادنا وبنمي الصفة عندهم كمان، وده غلط. لو جربنا نوصف ولادنا بصفات إحنا محتاجين نربيهم عليها، هنلاقي تطور كبير جدًا في شخصية الطفل، والطفل نفسه هيحب يعمل الحاجة.

سهلة وبسيطة ❤✌