ابنك واليوتيوب ! 🥺

أطفال كتير الفترة دي بقت متعلقة تعلق شديد باليوتيوب وده لأن المحتوي المقدم للأطفال محتوي جذاب جدا ، ولكن للأسف الطفل بيتأثر جدا بالمحتوي اللي بيشوفه علي اليوتيوب من أكثر من إتجاه :

- الكلام: 😔
كلام ولغة الطفل بيتأثروا بشكل كبير لو الطفل بيشوف يوتيوب كتير وهو لسه في سن صغير وبيتعلم الكلام ، اليوتيوب بيخلي الطفل يكتسب مفردات لغوية (كلمات) من اكثر من لغه ! ، كلمتين من الصيني علي شويه من الياباني وكمان حبه حلوين من الانجليزي علي لغه عربيه فصحى والقليل من العامية ، فينتج عندنا طفل لغته مشوهه ومختلطة ومتداخلة مع لغات تانية ، كمان عدم اشتراك الطفل في مواقف اجتماعية كلامية طبيعية، وانه يبقي مجرد مستقبل سلبي بيسمع وبس. ده من الممكن انه يؤدي إلي تأخر كبير في الكلام.

- السلوك: 😐
نظراً لانك عمرك ما هتعرف ابنك بيتفرج علي ايه ، فوارد جدا انه يتعلم سلوكيات جديدة سيئة جدا من اليوتيوب وكثيراً ما شوفنا العديد من الفيديوهات اللي بتروج لأفكار سيئة وبتزرعها في عقول اطفالنا من الصغر.

طب الحل ايه يا مستر حسام؟ 🤔
ابني بيحب اليوتيوب ومش بيرضي يسيبه خالص !

الحل في انك تراقب المحتوي بتاع اليوتيوب وتتأكد ان المحتوي اللي بيشوفه ابنك بتتوفر فيه ٣ شروط :

1- تعليمي هادف
2- يحتوي علي سلوكيات جيدة
3- باللغة العامية اللي الطفل واهله بيستخدموها في حياتهم الطبيعية ( مصرية ، سورية ، عراقية ، سعودية ... ألخ)

ازاي ممكن تعمل كده ؟ 🤔
دور علي فيديوهات تتوفر فيها الشروط دي وحملها وخليها تشتغل بدون نت بحيث ان الطفل كل اما يفتح التطبيق والنت مقفول ميلاقيش غيرها يتفرج عليه 🤷🏻‍♂️

كمان لازم تخلي بالك ان مشاهدة الفيديوهات لو يومياً تكون لمدة بسيطة 🕙

وبس كده ، لو عندك استفسار او محتاج مساعدة في شئ ، كلمني علي اكونتي عادي احنا اخوات ✌🏻