السرقة ،،،،،،،،👉👉👉👉👉👉👉👉🤔

من السلوكيات الشائعة لدي الأطفال و المثيرة للقلق لدي أسرهم و بتخليهم يخافوا علي أطفالهم من اعتياد الأمر و علي عكس الشائع فالسرقة عند الأطفال ليها عدة أسباب مش سبب واحد و كل سبب له طريقته و خطته في التدخل و العلاج
علي سبيل المثال

السرقة الإندفاعية عند الأطفال المندفعين خصوصا أطفال فرط الحركة و تشتت الإنتباه. هنا الطفل بيندفع للسرقة بدون ما يفكر و بعد كده ممكن يحس بالذنب أو، يعترف علي نفسه أو يكتئب لإنه شايف نفسه مش كويس و السرقة الإندفاعية بتكون سرقة لفلوس أو اشياء ظاهره قدام الطفل مش مستخبيه لإنها بتكون مش مع سبق الإصرار والترصد وانما إندفاعية

السرقة الإنتقامية و هي نوع من أنواع السرقة عند الأطفال خصوصا أطفال اضطراب العناد و هم نوعية من الأطفال بتكون عندهم مشكلة مع السلطة زي سلطة الأب والأم أو سلطة المدرس و عندهم عند مستمر تجاه أي أمر أو توجيه و بيتجهوا أحيانا للسرقة كنوع من الإنتقام من السلطة و من أوامرها و تحكماته

السرقة المضادة للمجتمع و نوع من أنواع السرقة عند الأطفال خصوصا من يعاني من اضطراب المسلك و هنا الطفل بيسرق لأنه لا يشعر بالذنب و مستعد للتعدي علي حقوق الآخرين من أجل مكاسبه الشخصية و الطفل دا بيعاني برضه من أعراض تانيه زي الكذب المستمر و العنف تجاه البشر والحيوانات

السرقة القهرية kleptomania نوع من أنواع السرقة عند الأطفال أو الكبار يشعر الطفل برغبة ملحة للسرقة ومتعة أو ارتياح بعد السرقة مباشرة ثم يشعر بالذنب بعد ذلك و غالبا تكون السرقة لأشياء ليس لها أهمية أو ثمن

السرقة النفسية و بيلجأ ليها الطفل اللي بيشعر أنه أقل من أقرانه فبتلاقي الطفل بيسرق علشان يعطي لأقرانه الأموال و يعزمهم علي الأكل علشان يشعر منهم بالحب والقبول

السرقة المصاحبة لصغر السن جدا أو للتأخر العقلي و بتحصل للأطفال الصغار جدا اللي لسه مش فاهمين مفهوم السرقة ومفهوم الصواب و الخطأ او للأطفال اللي بيعانو من التأخر العقلي لأنهم مش مدركين ان السرقة خطأ اصلا علشان مايعملوهاش

لذلك سلوك السرقة لو كان متكرر بيحتاج تقييم من طبيب نفسي متخصص لتحديد السبب والتشخيص و بالتالي العلاج المناسب للحالة سواء كان دوائي او سلوكي أو أسري