تربية الطفل بدون عنف: دليل شامل للأمهات والمعلمات

بوست طويل لكن مهم جدا وموجه لكل الأمهات ولكل معلمات التأسيس ورياض الأطفال
من هنا وجب التنبيه:
ياجماعة مفيش طفل بيتعلم بالطريقة دي
مفيش طفل بيتعلم أو بيتربى بالعنف والضرب
بعيد عن إن ده بيحصل ف مؤسسة تعليمية وبعيدا عن القوانين ف ده مش أساليب الإسلام ولا دي أساليب الإنسانية اصلا
و ف المقابل الطفل اللي بيوصل مدرسة للطريقة دي (اصل اكيد المعلم مش هيوصل للمرحلة دي اول ما يتعرف على الطفل ده معناه أنه حاول مرة واتنين وتلاته لحد ما وصلت معاه للعنف ده كله و بدون علم منها فاكراها طريقة وهتجيب لكن والله عمرها ما بتجيب) ده مش طفل طبيعي؛ ده طفل محتاج تدخلات خاصة
والمدرسين الأفاضل اللي بتقول لما العيل بيتشد عليه بيركز؛ حضرتك مش الطبيعي الطفل يتعذب عشان يركز التركيز عمليه تلقائية بتحصل مجرد ما يحصل للطفل انتباه
مفيش تركيز معناه انتباه الطفل ضعيف معناه محتاج تدخلات و اخصائي يقيمه ويشوف سبب المشكلة ويتخذ الإجراءات اللازمة لكن مش نضرب ونحط الطفل ف مساحة التهديد والضغط عشان يطلع كل اللي عنده
الطفل اللي بنحاول معاه مرة واتنين والأساليب العادية اللي بتنفع مع كل الاطفال الا هو ده طفل عنده مشكله
الطفل اللي مستواه متأخر ده طفل محتاج تدخل و تعليم بأساليب خاصة مش نحطه آخر ديسك ونقول هو كده
الطفل اللي مبيقدرش يركز مدة طويلة حضرتك محتاج تروح لأقرب أخصائي تطمن عليه
الطفل اللي كل ما تعلمه ينسى وتبقى محتاج تبدأ معاه من الاول ده مش طبيعي
و متقارنوش اطفالكم بحد
متقارنوش اطفالكم بحد
متقارنوش اطفالكم بحد
وتاني احنا كلنا كأخصائيين ومعلمين وأباء وأمهات دورنا هو مساعدة الطفل يكون احسن إلى أقصى حد ممكن مش نضغط ونشد عشان الطفل يكبر مهدد ومشوه نفسيا عشان يبقى زي ما احنا عاوزين، مش زي ما قدراته جايبة
وأخيرا،الكلمتين اللي بقولهم كل مرة ولأي كشف بيجيلي تقريبا؛ مفيش حاجة اسمها الطفل هيكبر ويتعلم، مفيش حاجة اسمها فلان كان كده وبقا كويس، مفيش حاجة اسمها بكره يتعلم، كل دي أقاويل بتدمر اطفالكم ومستواهم ومستقبلهم، ف اعرف مصلحة ابنك ودور عليها .
-------------