حكاية طفل متلعثم

يا دي التأتأه وسنينها، البيت كله عندي مش سايبني في حالي وكله في الراحه والجايه عمال يتريق عليا، اخويا الكبير لو زهقان بيندهلي اتكلم قدامه علشان يضحك، واخويا الصغير بيقعد يطلعلي لسانه ويقولي أأأ أنا بتكلم احسن منك. 🥺

امي وخالتي عاملين عليا تحالف وبيزعقوا لي كل شويه قال يعني كده هخاف وهبطل استعباط زي ما بيقولوا وهتكلم كويس، واختي الكبيرة اما بتيجي بعيالها عندنا بتقعد تقولهم بصوا يا حبايبي، لو مشربتوش اللبن هتقعدوا تتأتهوا كده ها ها ها، دمها خفيف اوي! 😔

الموضوع بقي صعب جدا ومحدش مقدر، نفسيتي تعبت والتأتاه عماله تزيد وعلشان كده قررت اقولهم النصائح دي يكشي يرحموني: 🤷🏻‍♂️

- اسمعوني بأهتمام، انا هكون مبسوط ومرتاح اكتر في الكلام اما الاقيكوا بتسمعوني بأهتمام والقلق عندي هيقل والتأتأه كمان.

- سبني اخلص كلام للآخر يا اخي، ليه بتوترني وبتقاطعني في الكلام، متقاطعنيش لو سمحت.

- محدش يعلق علي كلامي، محدش يقعد يقولي كل شويه اتكلم حلو، اتكلم عدل يا واد، ما لو هعرف اتكلم عدل مش هستناك اما تقولي يا ناصح.

- محدش يضحك علي كلامي، اما بتضحكوا عليا بضايق وببقي خايف بعد كده اتكلم معاكوا لتضحكوا عليا تاني، وكده التأتأة عندي هتزيد كل اما اتكلم معاكوا يا ناااس. 🥹

- ماما، متقوليليش يا كبدي و يا ضنايا ويا حبه عيني مش عارف تتكلم، انا قولت انا مش عايز احس ان في مشكلة، تعاطفك معايا الزايدة عن اللزوم ده هيخليني احس ان مشكلتي دي مصيبة كبيرة وهتوتر جامد اما اتكلم بعد كده.

- في ايام بكون تعبان فيها والتأتأه عندي شديدة، سبيني ومتتعبنيش بالكلام .. بس خليكي ناصحة، اما تلاقيني في ايام تانية التأتأه عندي قليلة اتكلمي معايا كتير علشان ثقتي في نفسي تزيد والطلاقة عندي تزيد والتأتأة تقل.

- كل النصائح دي هدفها في الاساس اني محسش بوجود المشكلة ومتأثرش عليا نفسياً، واني اثق اكتر في نفسي وفي كلامي .. ماشي؟

- وأخيراً يا ست الكل، ودوني اخد جلسات تخاطب، جلسات التخاطب حلوة وبتعالج التأتأه بسهوله فبلاش نضيع وقت.