الاختيارات المُجبرة: فهم سيكولوجية القرارات الصعبة

كلنا مخيرون بس اوقات مش بيكون قدامنا غير اختيار واحد ومجبرين عليه بس في نظر اللي حوالينا عندنا اختيارات كتير.

الكلام اللي هقوله من وجهة نظري الشخصيه ومعرفش اذا كان في دراسات عليه او لا.

يعني ايه بقا اختيار مجبر هقولك مثال بسيط واغلبنا مر بيه وقت وفاة شخص عزيز عليك وقريب منك بيكون الطبيعي عندك اختيارين يا تتأقلم يا تفضل حزين وتستسلم لحزنك لحد ما يتمكن منك وممكن تدخل في اكتئاب.

فالمنطقي للي حواليك انك تتأقلم وتحاول تتخطي فده اسمه الاختيار المجبر هو اختيار اه وممكن متختارهوش بس مجبر انك تختاره لانه منطقي اكتر.

فمش معني ان حد اختار حاجه يبقي لازم يكون مرتاح فيها او مبسوط مش شرط هو جايز يكون مجبر علي الاختيار ده.

زي امثلة كتير ممكن مثال الجنود اللي بيدربوهم في الصحراء بيدربوا علي انهم لو جعانين ياكلوا اي حاجه حتي لو حيوانات او حشرات ده شئ يبدو للبعض مقزز وغير منطقي وجايز الجندي نفسه عنده نفس المشاعر لكن ده اختيار مجبر عليه.

فالخلاصه بلاش نصدر احكام علي بعض ولا نقيس قدراتنا علي قدرات الاخرين كل واحد عنده ظروفه وقدراته النفسيه والبيئة اللي نشأ فيها تخليه ياخد رد فعل مختلف عنك لانه طبيعي اننا مختلفين ومش طبيعي ابدا اننا نكون كلنا متفقين في الاراء والافكار.

إن الانسان دائما يسعي للكمال ولكن لن يصل إليه.

احنا بشر طبيعي نخطئ ولكن الغير طبيعي عدم تقبلنا لاخطاء الاخرين واختلافهم عننا.

مش محتاجين نكون مثالين محتاجين نكون طبيعيين.