هتكلم النهاردة عن حاجتين من ضمن الحاجات اللي بتنمى الذكاء العاطفي
١- الذكاءات المتعددة
٢- معرفة لغة الحب للطفل
طيب خلينا نتكلم بإختصار عن الذكاءات المتعددة للعالم ( هاورد جاردنر )
والذكاءات هى (ذكاء لغوي ، رياضي ، بصري مكاني ، حركي ، موسيقي ، اجتماعي ، داخلي ذاتي)
يبقي الانسان ليه ذكاءات متعددة مش نوع واحد ولا تفكير جامد بس دايمًا بيفضل نوع منهم بيكون مميز بيه
بالتالي الأطفال بتفهم بطرق مختلفة وكذلك بتعبر عن مشاعرها بطرق مختلفة
في طفل بيعبر بالكلام ، طفل تاني بالحركة ، تالت بالرسم
ف بكده لما بنعرف نوع ذكاء الطفل القوى عنده بنساعده يوصل مشاعره بلغته هو وبطريقة مريحة ليه
فلو الطفل ذكاؤه
١- ذكاء لغوي:
-هيعبر عن مشاعره كويس
-هيسمي مشاعره بإسمها ( أنا خايف - أنا زعلان - أنا متحمس،..)
. نساعد الطفل ازاى يعبر عن مشاعره ويفهمها لو ذكاؤه لغوي ( نستخدم حكايات أو لعبة سؤال وجواب)

٢- الذكاء البصري المكاني:
-الطفل هيعبر بالرسم أو الصور
. هنساعد الطفل هنا بإننا نستخدم كروت المشاعر
أو نطلب منه يرسم شعوره
أو نعمل حاجه زى خط مشاعر أو ترمومتر مشاعر وعند كل درجة هنحط صورة شعور ونطلب منه يشاور على احساسه

٣- الذكاء الحركي:
-الطفل بيعبر من خلال الحركة
. مفيش أنسب ولا أمتع من لعب الأدوار بالنسبة للطفل
ولو الطفل يشعر بالغضب ممكن نقدمله عجينة أو لعبة أو مهارة حركية يفرغ فيها غضبه بشكل إيجابي

٤- الذكاء الموسيقي:
-الطفل بيتأثر بالأغاني والموسيقي
. وهنا هنستخدم أغاني عشان نعلم الطفل مشاعره
وممكن نعمل لعبة الكراسي الموسيقية وعلى كل كرسي شعور وأول ما الموسيقي تقف هيجلس الطفل على الكرسي الملائم لشعوره

٥- الذكاء الاجتماعي:
-الطفل بيحب يندمج في الجماعة ( بيحب الناس)
. وهنا هنعلمه إزاي يشعر بمشاعر الآخرين وإزاي يعبر عن مشاعره

٦- الذكاء الذاتي (الداخلي):
-الطفل بيحب يقضي وقت مع نفسه يتأمل ويفكر
•هنساعد الطفل في تهيئة جو للتأمل ونساعده يحط اسم لكل
شعور جواه
النقطة التانية وهى لغات الحب عند الطفل
أولًا: إيه هي لغات الحب؟
الدكتور غاري تشابمان هو اللي قدم مفهوم “لغات الحب الخمسة”، وقال إن كل إنسان (سواء طفل أو كبير) عنده طريقة معينة بيشعر بيها إنه محبوب، وهي:
٢. الكلمات المشجعة
٢. اللمسات الجسدية
٣. الهدايا
٤. الوقت النوعي (وقت مخصص له)
٥. أعمال الخدمة (زي المساعدة أو الرعاية)

كل طفل بيفضل نوع أو اتنين من دول أكتر من الباقي، ولما نستخدم لغته، بيحس إنه محبوب ومقبول.
ثانيًا: إزاي ده ينمّي الذكاء العاطفي؟

لما الطفل يشعر إنه محبوب بطريقته هو، ده بيأثر في مشاعره بشكل مباشر، وده بينعكس على ذكاؤه العاطفي بالشكل ده:
١. بيفهم مشاعره أكتر:
لما نقول له “أنا بحبك” بلغة هو بيحبها، بنساعده يتعلم يربط بين التصرفات والمشاعر.
٢. بيعرف يعبر عن الحب للآخرين:
لما نكون نموذج قدامه في التعبير، هو كمان بيتعلم يقول:
“أنا بحبك يا ماما”، أو أنا زعلان عشان حسيت إنك مش سمعاني.
٣. بيتعلم التعاطف:
لما يحس إننا بنراعي احتياجه، هو كمان بيتعلم يراعي احتياج الآخرين.
٤. بيحس بالأمان العاطفي:
وده أهم حاجة: الأمان زى ما ذكر ماسلو في هرم الاحتياجات
طفل حاسس إنه محبوب، هيقدر يتكلم، يغلط، يتعلم، يعبر، يهدأ.