إدارة المشاعر: التعامل مع الانفعالات المكبوتة وكيفية التغلب عليها

تعرف أيه عن المشاعر؟!!!💞💞💞
ليه أحيانًا بنبالغ في رد فعلنا على مواقف بسيطة؟ زي ما يكون جواك قنبلة مشاعر مكبوتة، بتنفجر فجأة. تخيل إنك طلبت شاي بالنعناع، وجالك من غير نعناع. تنهار وتبكي وكأن الموضوع أكبر بكتير.
الحقيقة مش في الشاي، لكنها مشاعر متراكمة، ممكن تكون إحساس بالإهمال أو الإحباط من مواقف قديمة ما خرجتش في وقتها.

في حياتنا، ممكن تكون في ذكريات متخزنة من الطفولة، زي لحظات تحس فيها بعدم الأمان، أو إساءات ما اتحلتش، أو حتى لحظات فقد فضلت عالقة جواك. ممكن تمر على مشهد في فيلم أو أغنية حزينة تحسسك فجأة بكل الحزن اللي كنت فاكره انتهى.
وزي ما *ديفيد هوبكنز* بيقول: "أكتر حاجة بنخاف منها هي مشاعرنا، لأننا ما نعرفش إزاي نواجهها، الخوف ده ممكن يخلي الإنسان يفضل الموت بدل ما يواجه إحساسه."

والمثير إن المشكلة مش في المواقف اللي مرينا بيها، لكن في إحساسنا اتجاهها.
*كارل يونغ* كان ليه مقولة حقيقية جدًا: "اللي بنرفض نواجهه جوا نفسنا، هيظهر في حياتنا كأنه قدر."

في حياتنا اليومية، التعامل مع المشاعر بيختلف من شخص للتاني ممكن تلاقي حد بيكبت مشاعره من غير ما ياخد باله، كأن عقله بيخفيها في اللاوعي علشان يحميه.
زي الطفل اللي كان محتاج حضن لما كان زعلان، لكن ما لاقاش اهتمام. المشاعر دي بتتحول لحاجة مكبوتة، ممكن تظهر عليه في الكِبر على هيئة قلق أو خوف من التواصل.

وفي نوع تاني من الناس بيقمع مشاعره، يعني بيختار بإرادته إنه يخبيها علشان يتجنب المشاكل.
تخيل شخص بيتعرض للضغط من مديره في الشغل، لكنه بيقنع نفسه إنه لازم يسكت ويحافظ على شغله. الفرق هنا إن الكبت بيحصل لاواعي، والقمع بيكون بوعي.

وفي ناس بتحب تفضفض كتير عن مشاعرها، وده في البداية ممكن يكون مريح، لكن لما الحكاية تزيد، المشاعر السلبية ممكن تكبر جواك بدل ما تهدى. كأنك بتكرر الموقف اللي مضايقك مرة بعد مرة لحد ما يتضخم ويتهول جواك.

وفيه اللي بيهرب زي الشخص اللي بينغمس في الشغل طول اليوم علشان يهرب من مشاكل بيته. أو اللي بينام ساعات طويلة لأنه مش عايز يواجه الواقع الهروب بيأجل المشكلة، لكنه ما بيحلهاش.

علشان تسيب مشاعرك تمشي في طريقها، لازم أول حاجة تتعرف عليها. اسأل نفسك: "أنا حاسس بإيه دلوقتي؟" واتقبل مشاعرك زي ما هي، حتى لو كانت صعبة. الفكرة هنا إنك تبقى صادق مع نفسك.

أحيانًا، مجرد التنفس ممكن يعمل فرق كبير. لما تحس بالتوتر، خد نفس عميق، ركز على حركة صدرك وبطنك، واسمح لجسمك يرتاح. تيك نات هان كان دايمًا يقول: "التنفس الواعي هو الجسر بين العقل والجسد."

ولو حسيت إن الكلام مش كفاية، جرّب تعبر بطريقة تانية. ممكن تكتب مشاعرك في ورقة، ترسم أي حاجة بتعبر عن إحساسك، أو حتى تتحرك وتفرّغ طاقتك. المهم إنك ما تخليهاش جواك.

وأهم حاجة، ما تكونش قاسي على نفسك. افتكر إنك لو شفت طفل صغير بيبكي، مش هتزعل منه، بل هتطبطب عليه وتطمنه. اعمل كده مع نفسك. احتضن مشاعرك وكأنها جزء منك محتاج حب واهتمام.