تنمية المهارات الحركية الدقيقة عند الأطفال
موضوع مهم مينفعش نغفل عنه !!َ 👀🤌🏻

لازم تعرف إن فيه فرق كبير بين 💁🏻‍♀️
المهارات الحركية الكبيرة (زي الجري والنط والتسلق)

والمهارات الحركية الدقيقة
( اللي هي الحركات الصغيرة اللي بتحتاج تركيز وتحكم في عضلات الإيدين والأصابع)

طب أولا كدا يعني إيه مهارات حركية دقيقة؟ 🫧🫧

يعني الطفل يعرف يمسك القلم صح، يفتح علبة، يقفل سوستة، يزرّر هدومه، يقص بالمقص، يلون جوه الرسمة، يركّب خرز، أو حتى يمسك معلقة وياكل لوحده.

ومن ضمن الكلام لازم تعرف مراحل تطور المهارات الحركية الدقيقة حسب العمر 👇🏻

من أول 6 شهور: مسك الألعاب الكبيرة✅

من سن سنة: مسك المعلقة، اللعب بالكتل✅

من 2-3 سنين: التلوين، تقليب صفحات كتاب✅

من 4 سنين: استخدام المقص، رسم أشكال بسيطة✅

من 5 سنين وطالع: ربط الحذاء، الكتابة بإتقان أكتر✅

ليه لازم نهتم بيها؟ 🫧🫧

عشان المهارات دي أساسية في حاجات كتير في حياة الطفل
خصوصًا في الدراسة لأن لو الطفل عنده صعوبة في استخدام إيده صح، هتلاقيه بيعاني في الكتابة، أو بيزهق بسرعة، أو بيفضل يعتمد على اللي حواليه في حاجات المفروض يعملها لوحده.

طيب نساعده إزاي؟🫧🫧

بأنشطة بسيطة ولذيذة بتتنفذ في البيت أو الجلسات، منها مثلاً:🫧🫧

نلعب بالمعجون ونطلب منه يعمل أشكال معينة✅

نستخدم مقص آمن ونخليه يقص خطوط مستقيمة أو أشكال بسيطة✅

نعمل أنشطة فيها خرز وخيط، أو حتى مكرونة وخيط✅

نديه ملاقط ينقل بيها كرات قطن أو اسفنجة من طبق للتاني✅

نلون سوا ونشجعه يلتزم بالخطوط

نركّب بازل مع بعض ✅

نعلمه يفتح ويقفل السوستة أو الأزارير ✅

وأي حاجة فيها تدريب على استخدام صوابعه 💁🏻‍♀️

مهم جدا 📌📌

الصبر لان الطفل ممكن يكون مش متعود أو عنده ضعف بسيط
لكن مع التكرار والتشجيع، كل حاجة هتتحسن. 💕

كل نشاط تعمله معاه هو خطوة لقدّام، وكل مرة ينجح فيها حتى لو خطوة صغيرة، لازم نحتفل بيها. 💕

وافتكر دايمًا 👀

"إيد ابنك فيها موهبة، بس محتاجة فرص تطلع."
ادّيله الفرصة، وادّيله وقت، وهتشوف الفرق !!!♥️