كيف أتعامل مع نوبة صرع لطفل بالجلسة؟ خطوات الأخصائي العملية.

✨📌 لو الطفل جاله نوبة صرع داخل الجلسة.. كأخصائي لازم أتصرف إزاي؟

كتير من الأخصائيين بيتوتروا جدًا لو واجهوا موقف زي ده لأول مرة. وعلشان نكون مستعدين، خلينا نفهم الأول: الصرع مش معناه خطورة على حياة الطفل طول الوقت، لكنه محتاج تعامل صحيح وسريع علشان نحميه ونحافظ على سلامته.

🔹 الخطوات العملية لحظة حدوث النوبة:
1️⃣ الهدوء أول خطوة إنقاذ → صوتك وحركاتك لازم يبقوا هاديين، لأن أي ارتباك منك هينعكس على الطفل أو اللي حواليه.
2️⃣ أبعد أي أدوات أو ألعاب ممكن تسبب إصابة، وجهّز مكان آمن حواليه.
3️⃣ متضغطش على جسمه ولا تمنعه يتحرك، لأن التشنجات خارجة عن إرادته.
4️⃣ احمي دماغه بوضع حاجة طرية تحت راسه زي جاكيت أو مخدة صغيرة.
5️⃣ متفتحش بقه ومتحاولش تمسك لسانه، ده خطأ شائع جدًا وممكن يسبب أذى.
6️⃣ فك أي لبس ضيق حوالين رقبته علشان التنفس يفضل طبيعي.
7️⃣ سجّل مدة النوبة باستخدام الموبايل أو الساعة، وده مهم جدًا للطبيب.
8️⃣ بعد انتهاء النوبة، الطفل بيبقى مرهق جدًا وعايز يرتاح. متضغطش عليه يكمل الجلسة فورًا، سيبه يستعيد وعيه تدريجيًا.

🚨 امتى أحتاج مساعدة طبية طارئة فورًا؟

لو النوبة استمرت أكتر من 5 دقايق.

لو النوبات اتكررت ورا بعض من غير ما الطفل يفوق.

لو حصل للطفل إصابة (وقع، اتخبط، نازل دم).

لو دي أول مرة الطفل يتعرض لنوبة صرع.


💡 نصيحة مهمة للأخصائي:
قبل ما تبدأ أي برنامج علاجي مع طفل عنده صرع، لازم تكون عارف الخطة الطبية اللي ماشي عليها (الأدوية – المتابعة مع دكتور مخ وأعصاب). وكمان تسأل الأهل عن الإجراءات اللي بيتبعوها عادة وقت النوبة، بحيث تكون جاهز وتتصرف بسرعة ووعي.

✨ تذكّر دايمًا:
التعامل الصح مع النوبة بيحافظ على سلامة الطفل ويطمن أهله إن ابنهم في إيد أمينة.

—
✍️ بقلم: د/ أمنية ياسر
📍 صفحة: أصل الحكاية: نُطق ووعي