ليه الطفل بيتعرض لنوبات غضب شديدة؟

نوبات الغضب بتحصل لأسباب مختلفة حسب عمر الطفل، لكن غالبًا بتكون بسبب:

١- الطفل مش قادر يعبر عن نفسه أو عن مشاعره :

الطفل الصغير بيحس بمشاعر كتير (زي الغضب أو الإحباط أو الحزن )
لكن ما بيعرفش يعبّر عن اللي جواه بالكلام، فبيصرخ أو يضرب أو يعيط بشدة

٢- محتاج يحس بالإستقلالية :

من سن سنتين فيما فوق الطفل بيبدأ يقول “لأ” كتير لأنه عايز يثبت إنه شخص مستقل و ليه رأي فلما بنحطه في موقف عدم إختيار أو بنحطه في أمر واقه بيصرخ وبيغضب

٣- الاحتياج للإهتمام والحب ( محتاج يتشاف) :

ساعات الطفل بيغضب عشان جعان أو تعبان ومش لاقي حد جنبه، أو مش واخد اهتمام كفاية خصوصًا لو في طفل جديد

٤- الطفل حاسس ان محدش فاهمه أو سامعه :
بيتقاله لأ أو بيتمنع عن حاجه بيحبها بدون أسباب واضحة
محدش بيسمع حزنه وشكوته ودايمًا حاسس إن اللي حواليه شافينه صغير ومش مهم

إزاي أتعامل مع طفلي وقت نوبة الغضب

- قبل أي حاجه لازم تكون هادي ، لو اتعصبت زيه نوبة الغضب هتزيد والوضع هيكون أسوأ صريخ بصريخ ولكن تماسكك قدامه وهدوئك هيديله أمان
- اعترف بمشاعره
انا عارف انك متضايق عشان كذا أنا فعلًا حاسس بيك
ده اسمه الاحتواء العاطفي بيساعد الطفل يهدى لأنه حس إنك فهمته وحطيت نفسك مكانه

- متتكلمش معاه كتير بشكل عقلاني أو تديله أوامر ونصايح لأنه مش سامعك ومش هيقدر يتقبل منك أي حاجه
قوله كلام بسيط وهادي زي أنا جنبك، لما تهدى نقدر نتكلم ونوصل لحل للأسف مش هقدر أتكلم معاك وانت متعصب كده

- متستجيبش لمطلب الطفل أو تديله الحاجه اللى بيعيط علشانها
يعني ما تستسهلش فورًا وتديه اللي عايزه علشان يسكت، لأنه هيكرر ده وهيعرف ان دى الطريقة المناسبة عشان ياخد الحاجه اللي عايزها وان ده الحل الأمثل للاستحابة لطلباته
- ساعد الطفل يهدى
خدوا نَفَس سوا ( نفس عميق )
احضنه لو كان متقبل لكن متغصبش عليه بالحضن
أو خليه في مكان هادي بعيد عن دوشة البيت
بعد ما يهدى اتكلم معاه : تحب تحكيلي كنت زعلان ليه

بعد ما يهدى تمامًا
اتكلم معاه عن اللي حصل واللي وصله لكده
ساعده يسمي مشاعره ( انا متضايق أو غيران أو موجوع ،…)
اقترح عليه طرق تانيه يلجأ لها في حالة ان حس بنفس الشعور تانى
( ده في مرحلة متقدمة من عمر الطفل (٣سنوات ونص ، ٤) يكون قادر يتكلم كويس
طيب لو مش قادر يعبر كويس ( سنه ونص ل ٣ ) هنتفق على ركن معين في البيت فيه ألعاب أو صلصال أول ما بحس بغضب يقعد في الركن ده ويلعب لحد ما يهدى ، ألوان وورق علشان يشخبط ويخرج طاقته أو هيكون عندنا كروت المشاعر ونطلب منه يشاور على شعوره )
إزاي اتجنب حدوث نوبة غضب من الأساس بشوية خطوات
• نحافظ على روتين ثابت للطفل
• نتأكد إنه إنه شبعان، نايم كويس، مرتاح وأخد الإهتمام الكافي ونركز معاه وقت ما ينادي
• بدل ما نجبره على حاجه معينه نقدمله اختيارات (بدل ما تقولي لا قولي تحب تعمل كذا ولا كذا )
• شجعيه يعبر عن مشاعره يوميًا بالرسم أو الحكي أو حتي إنه يشاور أو يعمل دايره عن شعوره
أهم حاجه نكون إحنا كمان قدوة لأولادنا لو شافك بتواجه غضبك بصراخ وصوت عالي هيعمل كده
ولو شافه بتقعد في جنب وبتهدي وبتاخد نفس أو بتقوم تصلي بردو هيعمل كده .. إبنك مرايتك