🎒 مهارات ما قبل المدرسة… القاعدة اللي بيتبني عليها مستقبل الطفل الدراسي والعاطفي والاجتماعي.

قبل ما تسألي:
"ابني هيدخل كي جي وهو مش حافظ الحروف، أعمل إيه؟"
وقبل ما تقولي:
"بنتي مش بتقعد تكتب ولا بتركز ف الحصة، هل عندها مشكلة؟"

لازم نسأل السؤال الأهم:
هل الطفل ده عنده "مهارات ما قبل المدرسة"؟
ولا إحنا بنطالب نبتة تطلع ثمارها قبل ما نرويها؟

💭 أغلب الأمهات بيختصروا المرحلة دي ف حاجات سطحية زي:

يلون؟

يحفظ؟

يعرف يمسك القلم؟


لكن الحقيقة أعمق من كدا بكتير...

👣 مهارات ما قبل المدرسة = تأسيس الطفل كإنسان قادر على التعلم.
مش بس كتابة
ولا حفظ
ولا قراءة

المهارات دي بتتوزع على ٥ جوانب أساسية:


---

🌱 ١. المهارات الحركية الدقيقة (Fine Motor Skills)
ودي اللي بيحتاجها الطفل علشان يقدر يمسك القلم، يقص بالمقص، يركب بازل، يلون، يفتح اللانش بوكس، يزرّر هدومه.
طفل ما اشتغلش على عضلات إيده، طبيعي يتعب أول ما يمسك القلم!

🎨 أنشطة بسيطة زي اللعب بالصلصال، التقاط الأشياء الصغيرة بالملقاط، التلوين بالأصابع… كل دي مش لعب، دي تأهيل حركي!


---

🧠 ٢. المهارات الإدراكية والمعرفية (Cognitive Skills)
زي التركيز، حل المشكلات، الترتيب، التصنيف، فهم التسلسل، التذكر، التوجيه والانتباه.
الطفل اللي مش قادر يركّز ٥ دقايق، أو ينفّذ أمر من خطوتين، مش هيفهم شرح الميس حتى لو كان العبقري الصغير!

🎲 ألعاب البازل، ترتيب الصور، تتبع المتاهات البسيطة، كلها أدوات لبناء عقل منظم.


---

👂 ٣. المهارات اللغوية والسمعية (Language & Auditory Skills)
ودي تشمل الفهم، التعبير، الوصف، الاستماع، وإعادة سرد القصة.
الطفل اللي مش بيفهم سؤال بسيط أو مش بيعرف يعبر بجملة، مش هيستقبل المعلومات في الفصل ولا يعرف يشارك.

📚 احكي له، اسأليه أسئلة مفتوحة، غني له، خليه يعيد وراك القصة بجمله هو. دي مش رفاهية، دي "مدرسته الأولى".


---

👫 ٤. المهارات الاجتماعية والانفعالية (Social & Emotional Skills)
زي احترام الدور، مشاركة اللعب، التعامل مع الغضب، حل النزاعات، طلب المساعدة، التواصل بالعين.
طفل دخل المدرسة وهو مش قادر يطلب من الميس أو يندمج في مجموعة، هيتحول لطفل "صعب" أو "منعزل".

🤝 اللعب الجماعي، تنظيم وقت انتظار، حوارات مع الطفل عن مشاعره… كل دي بتبني طفل متزن.


---

🚽 ٥. الاستقلالية (Self-help Skills)
زي يروح الحمام لوحده، يلبس هدومه، يلم لعبه، يحط حاجته في شنطته.
مش معنى إنه صغير، إنك تعمليله كل حاجة!
كل مهارة بيعتمد فيها على نفسه، بتقوي ثقته وقدرته على التكيّف.

🧼 عوّديه يعمل حاجته بنفسه، حتى لو بياخد وقت، دي طريقة لبناء "طفل متحمل للمسؤولية".


---

🎯 باختصار:
مهارات ما قبل المدرسة مش رفاهية
ومش اختياري
ومش بديلها الحفظ.

لو الطفل بدأ رحلته التعليمية من غير المهارات دي، هيواجه صعوبات هتتفسر غلط، ويتوصف أو يتعاقب على حاجات هو أصلاً ما تجهزش لها!

ابدئي من النهاردة،
ابدئي باللعب،
ابدئي بالحكي،
ابدئي بالروتين،
وبلاش تخافي من إن ابنك يتأخر شوية ف الحروف لو هو بيبني الأساس صح.

🏷️ منشن أم محتاجة تسمع الكلام ده
✍️ واكتبيلي ف الكومنتات:
إيه المهارة اللي ماكنتيش تعرفي إنها جزء من "مهارات ما قبل المدرسة"؟

📌 البيدچ: أصل الحكاية: نُطق ووعي
✍️ كتابة: أمنية ياسر