ما هي التربية الإيجابية؟ الفرق بين التربية الإيجابية وانعدام التربية

كتير من الناس بترفض مفهوم أو فكرة “التربية الإيجابية” قبل حتى ما تفهم معناها الحقيقي في الأغلب الناس بتتصور إن التربية الإيجابية يعني إني مش هربي ابني وإن أقصى رد فعلي هيكون إني أقول له “عيب يا حبيبي” وخلاص من غير ما أخد أي موقف أو ريأكشن تجاه تصرفاته الغلط بيعتقدوا إن التربية الإيجابية معناها إني أدلّع الطفل، وأنفذ له كل طلباته وأخليه شخص مدلل زيادة عن اللزوم لكن الحقيقة مختلفة تمامًا التربية الإيجابية معناها إني أربي ابني تربية وسطية فيها الحزم وفيها القوة لكن في نفس الوقت فيها حب وحنان واحترام يعني أتعامل مع الطفل على إنه إنسان له مشاعر وكيان و شخصية لازم أقدرها وأحترمها ولما ألاحظ سلوك سلبي دوري إني أشتغل عليه وأساعد الطفل يغيره مش أهمله الهدف مش بس أطلع طفل مؤدب بيسمع الكلام بس لكن أطلع إنسان إيجابي واقف على رجليه له دور ومسؤولية في المجتمع لما أربي الطفل بطريقة فيها إهانة أو ضرب أو قسوة فأنا كده مش بربي أنا بشوه والنتيجةإنه بيطلع شخص مهزوز بيدخل المجتمع يدمره بدل ما يبنيه و بدل ما يكون إنسان و زوج وأب صالح بيكون شخصية فاسدة و مؤذية وممكن تكون عبء على اللي حواليه فيه فرق كبير جدًا بين “التربية الإيجابية” و”انعدام التربية” فرق بين إني أربي ابني بطريقة تحفظ كرامته وتحافظ على شخصيته وتخليه يعرف نفسه وحدوده وحقوقه وبين إني أطلع شخص مهزوز ضعيف، بيسمح لنفسه يأذي أو يهدم أي حاجة حواليه التربية الإيجابية مش معناها إننا مش بنربي ولادنا بالعكس… إحنا بنربي بس بعقل وبحب وبإحترام