💔 اكتئاب ما بعد الولادة… الجرح اللي مش باين في الأشعة 💔

أنا أمنية ياسر – أخصائية تخاطب وتعديل سلوك، وشغلي خلاني أشوف قد إيه نفسية الأم بعد الولادة بتشكل حاضر الطفل ومستقبله.

الأم بعد الولادة مش بس بتولد طفل… بتولد معاها مشاعر جديدة، وتحديات ما كانتش موجودة قبل كده، وجسمها مش زي الأول، ونومها بقى قليل، ومحدش بيسألها “أنتي عاملة إيه؟” من غير ما يكون القصد بس على البيبي.

اكتئاب ما بعد الولادة هو مش رفاهية نفسية ولا كلمة عابرة، لكنه اضطراب حقيقي بيصيب نسبة كبيرة من الأمهات، واللي بيسكته المجتمع بكلمة "كبرى دماغك"، أو "ده من قلة الإيمان"، أو "بقيتي أم… افرحي"، وكأنها زرار نضغط عليه فيختفي الألم!

❗ لكن الحقيقة؟
الاكتئاب ده ممكن يخلي الأم:

🔹 تحس بعدم جدارتها كأم
🔹 تتجنب النظر أو لمس طفلها
🔹 تبكي بدون سبب
🔹 تحس إنها فقدت نفسها
🔹 تتمنى لو الزمن يرجع
🔹 تضعف علاقتها بجوزها
🔹 تنعزل، وتتراجع عن كل أدوارها

وهنا يظهر دوري كأخصائية تخاطب وتعديل سلوك…
ليه؟ لأن العلاقة بين الأم وطفلها هي أول لغة بيتعلمها الطفل…
هي الحنان، والحضن، والابتسامة، والنظرة، والاهتمام اللي بيزرع أول بذور الكلام والسلوك والتواصل.

👶 الطفل اللي أمه مكتئبة لفترة طويلة ممكن يعاني من:

تأخر لغوي

تأخر في مهارات التواصل الاجتماعي

اضطرابات سلوكية (زي العناد، أو الانطواء، أو نوبات الغضب)

ضعف في المهارات الإدراكية والانتباه


🎯 علشان كده، دعم الأم مش رفاهية… ده علاج وقائي للطفل قبل ما يكون علاج نفسي للأم.


---

طيب، نساعدها إزاي؟

🔸 ناخد بالنا من العلامات بدري
🔸 نسمعها من غير أحكام
🔸 نوجّهها لمتخصص
🔸 نساعدها تخرج من عزلتها
🔸 نفكرها إنها مش لوحدها
🔸 نفتكر دايمًا إن أقوى أم، هي الأم اللي خدت خطوة للعلاج، مش اللي بتحاول تمثل إنها تمام وهي بتنزف جواها


---

لو إنتِ أم جديدة وبتقري الكلام ده وحاسة إنك بتعيشيه… فصدقيني:

أنتِ مش ضعيفة… أنتي محتاجة حد يسمعك ويمدلك إيد أمان.

الأم القوية مش اللي ما بتتعبش…
القوية هي اللي بتعرف تقول "أنا مش بخير" وبتاخد خطوة علشان تتعافى، علشان تكمّل أم عظيمة، بجد.


---

#أصل_الحكاية_نُطق_ووعي
بقلمي: أمنية ياسر – أخصائية تخاطب وتعديل سلوك
📌 لو شايفة إن البوست ده مهم… شاركيه مع أي أم محتاجة تحس إنها مش لوحدها ❤️