افهمى_زعبولة...
زعبولة بعد السنة بيحصله تغيرات كتيررررة.....
بيتحول من طفل عبيط كده🤤... قاعد ياكل وينام ويعيط...
لواحد تاني خالص بيعترض ويقول لأاااا.. ومش راضي يقعد ساكت وبيجرى هنا وهناك ومزهقنا عاوز يمسك كل حاجة ويلعب في كل حاجه حواليه... ويفتح الأدراج ويدخل المطبخ وياخد منييي موبايلييي ....

الأم اللي إبنها كده دى أم شاطرة وعرفت تدمج إبنها بالعالم اللي حواليه بسرعة... وحقها تفرح وتتنطط علينا كمان 😃...
لأنها عملت إنجاز رهيييييب.... في أمهات تانية للأسف تتمني إبنها يعمل ربع الحاجات دى
- تيجي أم تقولي طب اعمل إيه عشان فرحتي تكمل ومدخلش فى صِدام معاه وأتجنب عِنده وعصبيته ؟!🤔

- حاضر .. هاقولك تعملي إيه
عشان نكون مُتفقين... العِند والصُراخ هيجي إمتى؟!
هيجي لما هو يكون عاوز حاجة والحاجة دي إما خطر عليه أو إنتي مش عاوزة تديهاله أو الحاجة دي مش بتاعته ومش هعرف أجبهاله.. صح كده؟

🛑 أولا .. الحاجات الخطر ... بصي يا ست الكل إنتى من أول ما زعبولة يوصل السن ده شيلي أى حاجة خطر من قدامه...

😊 نقفل فيش الكهربا...
😊 نرفع الشاشه في مكان عالي...
😊 نقفل النيش...
😊 نقفل المطبخ أو نخبي الحاجات الخطيرة زي السكاكين، والمقصات، والمنظفات، وغيره وسيبيه يلعب بالباقي
لو ظبطتي الدنيا هترتاحي منه وهتسبيه يلعب ويكتشف براحته من غير صراخ وعياط👍..

🛑 طب ثانيا .. إيه الحاجات اللي مش عاوزة تديهاله؟
مثلااا الفون 😢 مش عاوزاه يصرخ عليه يبقي متمسيكهوش قدامه طب لو أخده منك تعملي إيه ؟! .. تسبيه يلعب بيه شوية وأول ما يغفل عنه جري تخفيه بعيد عنه ولا من شاف ولا من دري😂 ..

🛑ثالثاً.. بقي لو عيط علي حاجه بتاعة حد غريب... تمشي من المكان فوراً
- أيوة تمشي لأن إبنك يا ست الكل مش هيسكت ومش هيتنازل عن الحاجة اللي عايزها
يا إما تشيلي الحاجة دي من وشه خالص وتشغليه بحاجة تانية

تيجي واحدة او واحد من اللي قاعدين.. (جهله ولا يعرفوا حاجه عن الطفولة وازاي نتعامل مع الطفل)
يقولك إيه الدلع ده .. إنتي مش عارفة تربي .. أنا لو مكانك كنت إديته بالقلم على وشه 😲 ..

بصي ولا كأنك سمعتي حاجة دول ناس متخلفة ولا تفهم أي حاجة لو سمعتي كلامهم إبنك هيطلع حاجة من الاتنين 👇
- إما عصبي وعِنَدي وكل حاجة هيطلبها بالصراخ والضرب
لانه طفل شخصيته قوية ومش هيتنازل

- أو هيسكت ويخاف ويبقي بشخصية ضعيفة... بكرة وبعده يِضّرَب على قفاه ويجي يعيطلك وتيجي تشكي تقولي أعمل إيه لإبني عشان محدش يضربه وتبقي شخصيته قوية!
قوية منين بعد ما دمرتيها 😣💔

⚠️من الأخر حاولي تتجنبي إنك تدخلي في صدام معاه
خليكي ذكية واعرفى تضحكي علي إبنك إزاي
راح ولا جه ده حتة عيل مطلعش من البيضة 😉