ابني يكذب: كيف أتعامل معه وأُنمي صدقه؟

"ابني بيكدب أتعامل معاه أزاي؟"

1️⃣ افهمي ليه بيكدب قبل ما تحكمي عليه:
قبل ما تقولي "أنت كداب"، فكري الأول: هو بيكدب ليه؟
لو خايف من العقاب: زي لما يكسر حاجة ويقول: "مش أنا!"
لو عايز يلفت انتباهك: زي لما يقول: "أنا الأول على الفصل"، وهو مش كده.
لو بيتخيل أو بيبالغ: زي لما يحكي قصة خيالية ويكون مصدقها.
✅ الحل: بدل ما تهاجميه، فكري إزاي تعالجي السبب اللي خلاه يكذب.

2️⃣ خليكي قدوة في الصدق:
الطفل بيتعلم منك أكتر من كلامك. لو شافك بتقولي حاجات مش حقيقية، هيتعلم إن الكذب عادي.
مثال: لو رنّ التليفون وقلتي "قول لهم إني مش موجودة"، الطفل هيشوف إن الكذب سهل ومقبول.
✅ الحل: دايمًا كوني صريحة حتى في الحاجات الصغيرة، وهتلاقيه بيقلدك.

3️⃣ افتحي له باب الأمان بدل المواجهة:
لما يكذب، لو واجهتيه بحدة هيخاف ويكمل في الكذب.
مثال: لو قال "ما أكلتش الشوكولاتة"، وإنتِ عارفة إنه أكلها، لو قلتي "إنت كداب!"، هينكر أكتر.
✅ الحل: قولي له بهدوء: "لو كنت أكلتها مهزعلش، بس يهمني إنك تقول الحقيقة"، ده هيخليه يحس بالأمان ويعترف من غير خوف.

4️⃣ شجعيه لما يكون صادق:
لما يعترف، حتى لو عمل حاجة غلط، لازم يحس إن الصدق حاجة كويسة.
مثال: لو قال "أنا اللي كسرت اللعبة"، بدل ما توبخيه، قولي له: "أنا فخورة إنك قلت الحقيقة، يلا نشوف إزاي نصلحها".
✅ الحل: لما يلاقي إن الصدق بيخليه في موقف آمن، هيبدأ يعتمده أكتر.

5️⃣ علميه العواقب بدل العقاب:
بدل ما تعاقبيه لما يكذب، خليه يشوف نتيجة كذبه بنفسه.
مثال: لو قال "أنا عملت الواجب"، وهو معملهوش، سيبيه يروح المدرسة ويواجه المدرس، بدل ما تعاقبيه في البيت.
✅ الحل: لما يحس إن الكذب بيعمل له مشاكل أكتر من الصدق، هيبدأ يتجنبه من نفسه.
#ابني_وسلوكه