🎧 الوعي الصوتي (الفونولوجي).. الخطوة اللي قبل الحروف!

في أطفال كتير بنتعامل معاهم وكأن المشكلة عندهم في القراءة أو الحروف أو الكتابة، وننسى إن في خطوة قبل كل ده..
خطوة لو اتعلموها صح، كل الحاجات التانية هتمشي على سكة ثابتة.
الخطوة دي اسمها "الوعي الصوتي" أو "الفونولوجي".

يعني إيه وعي صوتي؟
يعني الطفل يقدر يسمع الصوت جوا الكلمة ويميزه، يشيل صوت ويحط مكانه صوت تاني، يقسم الكلمة لأجزاء، يعرف أول صوت في الكلمة وآخر صوت، ويحس بالإيقاع والتركيبة الصوتية لأي كلمة بيسمعها.

🎯 الوعي الصوتي مش حفظ.. الوعي الصوتي إحساس!
يعني الطفل لما يسمع كلمة "موز" يعرف إن أولها "م"،
ولما نقوله: لو شيلنا "م" من موز، يتبقى؟
يبصلك وهو فاهم ويقول: "وز"!

🧠 المهارة دي بتبني عقل قارئ حتى قبل ما الطفل يشوف شكل الحرف.
ولو اتعلمت واتأسست صح، القراءة والكتابة مش هتكون عبء ولا عقدة.

طيب.. أبدأ إمتى؟
من بدري جدًا!
من أول ما الطفل يبدأ يتكلم، أبدأ ألعب معاه ألعاب فيها تقطيع للكلمات، تكرار، قوافي، أصوات، تنغيم.
الأغاني، القصص المقفّاة، حتى الألغاز، كلها أدوات سحرية.

💡 الطفل اللي عنده وعي صوتي قوي، عنده استعداد لغوي أقوى بكتير.
ومع كل جلسة أو وقت لعب، إحنا مش بنعلّمه حروف بس،
إحنا بنبني طريقه نحو فهم الصوت.. وبعده المعنى.. وبعده الكلمة.. وبعده الجملة.

منشن أم أو معلمة مهتمة تفهم أكتر عن الوعي الصوتي 🧩
واكتبيلي في التعليقات:
هل كنتِ تعرفي إن دي مهارة ممكن تتعلم من سن صغير قبل ما الطفل يعرف الحروف؟

📝 اسم البيدج: أصل الحكاية: نُطق ووعي
✍️ كتابة: أمنية ياسر