يا تري ايه هي الأعراض الجسدية المصاحبة لاضطراب القلق
عمرك حسيت إن قلبك بيدق بسرعة كأنك كنت بتجري، بس الحقيقة إنك قاعد في مكانك؟
أو تحس كأنك مخنوق؟
طب الدوخة اللي بتجيلك فجأة، وكأن الدنيا بتلف بيك؟

كل الأعراض دي مش خيال، ومش معناها إنك مريض عضوي، لكنها علامة واضحة إن القلق مش سايبك في حالك.
جسمك بيتصرف كأنه في خطر، حتى لو مفيش حاجة حقيقية، وده اللي بيخليك تحس بحاجات زي:
• دقات قلب سريعة أو قوية.
• إحساس إن نفسك مقطوع أو فيه حاجة تقيلة على صدرك.
• دوخة مفاجئة كأنك هتقع .
• تنميل في الإيدين والرجلين، أو رعشة من غير سبب.
• وجع في عضلاتك، خصوصًا في الضهر والكتف، كأنك شايل هم الدنيا.
• مشاكل في المعدة زي غثيان، إسهال، أو إمساك من غير سبب واضح.
• عرق زيادة، حتى لو الجو مش حار.
• إحساس إنك حران أو بردان فجأة.
• شعور إن في حاجة واقفة في زورك ومش قادر تبلع كويس.
• إرهاق مستمر حتى لو نايم كفاية ومش عامل مجهود.

اللي بيحصل إن مخك بيبعث إشارات لجسمك إنه في خطر، فبيبدأ جسمك يشتغل كأنه بيحاول يحميك، وده اللي بيخليك تحس بكل الأعراض دي.
المشكلة إنك لو فضلت مركز معاها هتحس إنها بتزيد، وده لأن القلق بيكبر لما تركز عليه.

الحل؟

تبدأ تاخد بالك إن كل ده مجرد إشارات من جسمك، مش حاجة حقيقية تهدد حياتك.
جرب تهدى، تاخد نفس عميق، تغير مكانك، أو حتى تلهي نفسك بحاجة بسيطة.
ولو الموضوع بقى متكرر ومؤثر على حياتك، متترددش تطلب المساعدة، لأن القلق ممكن يتحسن ويتعالج، ومش لازم تعيش بيه طول عمرك.