لماذا أصرخ على أطفالي ثم أندم؟ اكتشفي الأسباب والحلول الفعالة

أم بعت تسأل ....ليه بزعق لأولادي وبعدها بندم ؟

ليه بتزعقي؟

1. الضغط النفسي و التراكمات اليومية .
يعني الروتين اليومي المتكرر بيخلي الجهاز العصبى دايما"في حالة توتر وانفعال سريع.
يعني ممكن تكوني مرهقة جدًا من مسؤوليات البيت، الشغل، أو حتى من التوتر العاطفي، وبيكون صوت ابنك/بنتك أو تصرفه هي"القشة اللي قسمت ظهر البعير".
2. تكرار السلوك من الطفل.
لما تحسي إنك قلتي نفس الكلام مليون مرة ومفيش نتيجة، بتوصلي لمرحلة الانفجار، وبتزعقي كرد فعل تلقائي.
3. غياب مساحة شخصية أو وقت للراحة.
الأم اللي مش بتاخد وقت لنفسها أو لحظات هدوء، بتبقى على طول في حالة "استنفار"، وده بيخليها تزعق بسهولة.
4. تربية داخلية قديمة.
ممكن تكوني اتربيتِ على الصوت العالي، فبقى هو رد الفعل التلقائي عندك في المواقف اللي فيها توتر أو تحدي.
5. غياب الدعم والمساندة.

😔 ليه بتحسي بالندم بعدها؟

لأنك بتحبي أولادك، وبتكوني عارفة إنهم مش بيقصدوا يضايقوكي.
لأنك عارفة إن الصراخ مش هو الأسلوب اللي انتي نفسك تربيهم بيه.
لأن ضميرك صاحي، وده شيء إيجابي جدًا… بيدل على وعيك ورغبتك إنك تكوني أم أفضل.

👈تعملي إيه علشان تقللي من الزعيق؟

1. لاحظي الموقف قبل ما تنفجري: خدي نفس عميق، حتى لو ثانية، واعملي وقفة قبل ما تردي.
2. اكتبي أسبابك الحقيقية: هل انتِ متضايقة علشان سلوكهم؟ ولا علشان تعبك؟ ولا علشان حاجات تانية؟
3. خدي وقت لنفسك ولو 10 دقايق في اليوم.
4. اتكلمي معاهم بهدوء وقت الراحة، مش وقت الغضب.
5. اعملي روتين لفض غضبك.

#وعيك بالمشكلة اول طريق للتغير.
#تصالحي مع احتياجاتك.
#ابدئي بخطوات بسيطة.
#اطلبي المساعدة.